Mairang, Risaw 27
Ki trai trok bad ki nongñiah trok kiba don hapoh ka lama jong ka Meghalaya Commercial Truck Owners & Drivers Association (MCTODA) ki la pynpaw ïa ka jingbynñiaw kaba jur halor ka jingshah kynnoh ‘High Level’ bad ba ka jingsniew jong ka surok Mawmaram sha Lad Umsaw ka dei na ka jingïaid jong ki trok.
Haba kren sha ki lad pathai khubor hadien ba la wai ka jingïalang kaba la long ha ka Sngi Saitjaiñ ha Mairang, Eastern West Khasi Hills District, u President ka MCTODA Bah Mosklandar Marngar u la ong, ka jingkhot ïa kane ka jingïalang ka long na ka bynta ki trai trok ki nongñiah trok bad ka long beit halor ka jingeh ha kaba ïadei bad ka jingshah khang ka surok na Mawmaram sha Lad Umsaw.
U la ong hadien ba la mih ha ki khubor na u MP halor ka jingleit jurip ka jong u kum u nongmihkhmat ha kaba u la ong ba ka jingsniew lane ka jingjynjar ha ka jingïaid lynti ïa ka surok Mawmaram-Lad Umsaw ka long namar ka jingïaid jong ki trok ‘High Level’.
“Kane ka la pynsngewsih ïa ki trai bad ki nongñiah trok namar ki la pyndonkam ïa ka surok na Mawmaram sha Mawlyndep ka dei ka lad kaba khatduh, naba ka dei ka jingkyrmen barit bha khamtam ïa ki trai trok bad ki nongñiah trok ha kaba kane ka surok ka la kylla u budlum ïa ki naduh ba la khang ïa ka surok na jingkieng Umïam,” u la ong.
U la ong ruh ba bun ki la ïa hylla sharum-shaneng ban buh jingkylli ba kaei ka daw jong ka jingkiew dor ki mar bam mar dih, ha kaba ka jingkdew kti ka leit beit sha ki nongñiah trok. Hynrei u la ong, lada ka lynti ïaid ka long kaba rit bad ka jingbam umphniang ruh ka duna, te kum ki trai kali ruh kin shim duna ïa ka bai kali hynrei lada ka bun ka jinglut, te hap ban shim ruh katkum ka jinglut.
U la ïathuh ruh ba ki la ailad hi ban ïaid na Mawryngkneng bad ong ba ka shim por jan ar sngi shi miet bad haba ïaid na Shillong ki lap ba lada don ka jingsniew jong ki kali heh kit mar tang lai ne saw tylli ka sor Shillong ka la kulmar lut. Kumta ki la jied beit ban ïaid na Lad Umsaw sha Mawmaram na ka bynta ka bit ka biang lang jong baroh.
U la ong ruh ba ka jingkhot ïa kane ka jingïalang ka long hadien ba ka la mih ka hukum na ki bor pynïaid district ba la khang ban ïaid ki kali heh kiba kit palat pud bad kaba kham kongsan bad kaba pynsngewsih ka long ba ka la mih ka jingkynnoh ba ki trok kiba ïaid lyngba ka Mawmaram-Mawlyndep ki dei ki trok ‘High level’.
U Bah Mosklandar u la ong, “Kaei kaba ngi lap ma ngi ka long ba hadien ba u MP u la kren kumto ïa katei ka surok, la don ruh ki riew shimkabu kiba la buh da ki khyrdop lum khajna ha kato ka surok bad ki byrngem byrsit ïa ki dkhot ki jong ngi bad ïa ki nongialam”.
U la ong ba halor kane ka bynta ka jingïalang da kawei ka jingmut ka la shim ïa ka rai ban ban leit ïakynduh ïa ka DC.
U Secretary ka MCTODA u Bah Peter Marbañiang u la ong, nalor ka rai ban leit ïakynduh ïa ka DC la shim ruh ïa ka rai ban leit ïakynduh bad ïa shong pyrkhat bad ki 12 tylli ki Shnong ka thaiñ Nongthliew, ba balei ka jia bad ka pynsohsat bad lada kam urlong kin sa shim pat da kawei ka sien jam.
U la kyntu ïa ka DC ba kan kham pynkloi ban shimkhia ïa kane ban ïakren ïa kane namar kiba shim kabu kiba bun nangne shakhmat.
“Ngi shah kynnoh ki High level, ki kali jong ngi ki shah kynnoh ki kali High level, ki kit dewïong, kit khaw kit shini, ki kit kiei kiei ruh mar sien ïohi ïa ki kali ki kynnoh high level. Ngi kwah ka jingshai, ki paidbah ruh kim dei ban shu ngop klumar tang ba ong ki briew,” ong u Bah Peter.
U Bah Risol Basalormaw uwei na ki nongshong shnong ka thaiñ Nongthliew ruh u la kyntu ïa ka Sorkar bad ki bor synshar ka East Khasi Hills District ban ym khang ïa ka leit ka wan na kane ka surok na Mawmaram sha Lad Umsaw namar kane ka surok ka dei u budlum ïa ka leit ka wan ka kit ka bah ki 12 tylli ki shnong ka thaiñ.
