Mawkyrwat, Risaw 28
Ka kynhun jong ki nong-thoh khubor na Shillong hapoh ka jingïalam ka tnat Directorate of Information & Public Relations (DIPR) ha ka 28 tarik u Risaw, 2024 ki la hiar sha South West Khasi Hills District ban leit jngoh ïa ki projek bapher bapher hapoh kane ka District kiba ïoh lyngba ka Mawkyrwat C&RD Block bad kumjuh ban ïakynduh ïa ki heh ophisar naduh u Deputy Commissioner Bah Barnari Mawlong, u Deputy Superintendent of Police Bah D Mawleiñ, ki ophisar napoh Mawkyrwat C&RD Block, ki Myntri Shnong bad kiwei kiwei.
Ha kane ka sngi, ki nongthoh khubor ki la hiar nyngkong eh ha shnong Jakrem ban peit ïa ki surok hapoh jong katei ka shnong, ka jingkieng bad kynroh ha Mawpon ban pynneh pynsah ïa ka jingkhuid jingsuba jong ka wah Sala, bad kumjuh ruh ka jaka saitjaiñ ha Mawpon ba la tei khnang ban pynthikna ba ka um sabon kan ym tuid sha kane ka wah.
Hadien la ïoh ruh ban leit jngoh ïa ka jaka jngohkai pyrthei ne ka viewpoint ha ka shnong Phlangkynshi Mihngi, kaba jngai kumba 20 Km eiei na Mawkyrwat.
Haba ïakren bad u Bah Barnari Mawlong, DC ka South West Khasi Hills District u la ïathuh ba kane ka distrik ka dang kynjoh 12 snem eiei bad bun na ki kam pynroi hapoh ki shnong ki thaw ki dei kiba ïoh na ka Mawkyrwat Block lyngba ka skhim MGNREGS ne ka skhim bylla 100 sngi.
U la ïathuh ruh ba ka South West Khasi Hills District ka dei kawei na ki distrik kaba don bha ïa ka lad ban kyntiew ïa ka kam jngohkai pyrthei bad u la ïathuh ba ka daw kaba pynlong ban duna ki nongwan jngohkai pyrthei ka dei namar ka jingsniew ka surok wat la kane ka distrik ka don shibun ki jaka ba itynnad.
U DC u la pynpaw ruh ïa ka jingangnud ban kyntiew ïa ka kam jngohkai pyrthei hapoh kane ka distrik ha kaba u la pynsngew ruh ha baroh ar ngut ki MLA ka district ba kin ïakren bad ka Sorkar ban pynbha ïa ka surok ka ban long kum shibynta ban khring ïa ki paidbah ha ka kam jngohkai pyrthei.
Haba phai pat sha ki kam sniew kane ka distrik kumba long mynta ka don hapdeng ka shongsuk-shongsaiñ. Ki kam tuh kam thiem bad ki kam runar ki dang duna bha hapoh ka distrik namar ki paidbah ki don ka jingïatreilang bad ki pulit, ïa kane la ïathuh da u Bah D Mawleiñ, DSP ka SWKHD.
U Bah Mawleiñ u la ïathuh ruh ba ki case kiba kham don hapoh ka distrik ki long ka POCSO bad ki kam tuh kam thiem kiba rit, u la ïathuh ruh ba u drok u dang duna lada ïanujor bad kiwei ki distrik kumjuh ruh ki kam runar ha ki jaka khappud bad ka Bangladesh namar ki pulit ki ïatreilang bad ki BSF.
