Shillong, Risaw 28
Ka Hynñiewtrep Integrated Territorial Organisation (HITO) ha ka 28 tarik u Risaw 2024, ka la leit ban buh da ka ejahar ha ka shlem treikam u Superintendent of Police (SP) ka East Khasi Hills District pyrshah ïa kawei ka samla Khasi kaba la tip kyrteng kum ka Anisha bad ha kajuh ka por ïa kaba la tip ruh kum ka samla Bangalore kaba dei ka samla kaba ju beiñ-khoh da ki kyntien kiba laiphew jait pyrshah ïa ki Khasi ha ki rynsan ‘social media’ lyngba ka Instagram.
Ka jinghap ban leit ujor ka seng pyrshah ïa katei ka samla ka dei namar ba na ka por sha ka por, kane ka samla ka ju pyni ‘live’ ne ring dur khih ha ki rynsan ‘social media’ da kaba beiñ ïa ki Khasi bad ïa ki seng. Ym tang katta, ka ju kren bad leh ruh ïa ki kam kiba khlem-akor bad kumjuh ka shait pyndonkam ruh da ki ktien kiba tohmet. Kumta na ka liang ka seng ka la kyrpad ïa ki bahaïing-bahasem ba ki dei ban ïalam noh ïa kane ka samla sha la ïing-la sem ha ryngkat ka jingsneng-jingkraw ïa ka.
Haba kren sha ki lad pathai khubor, u General Secretary ka HITO Shillong City, u samla Balajied Jyrwa, u la ong ba ki kyntien ba la pyndonkam da katei ka samla ki long ki kyntien kiba tohmet haduh katta-katta kiba la ktah shikatdei eh ïa ki paidbah, ka jaidbynriew baroh khamtam eh ïa ki samla Khasi.
Nalorkata, kane ka samla ka ju kren kop ruh ïa ki bor pulit bad ïa ki seng ba kin wan ban kem ïa ka lada ki nud shisha da kaba pynmih ruh ïa ki ‘tiensih-‘tiensang. Namar kata, na ka liang ka seng ka kyrmen ba u SP un shim khia halor kane ka ejahar ba la wan ban buh da ka seng.
“Ngi kyrpad ïa ki bahaïing-bahasem jong kane ka briew ba ki dei ban shim khia ban wan ïalam noh ïa ka sha ïing ban ai ïa ka jingsneng-jingkraw ïa ka khnang ba kum kine ki jingleh jong ka kin ym jia shuh nangne shakhmat”, ong u samla Balajied.
Shuh-shuh u samla Balajied u la ong ba ki paidbah ki dei ban ujor ruh ïa ka sla jong ka ha Instagram khnang ba kan shah weng noh na ki rynsan ‘social media’ namar ka jingleh jong kane ka samla ka la kylla long ka jingthad bad ka jingpynjah burom ïa ka jaidbynriew bad ïa ka rukom long jong ki khun Khasi-Khara.
