Shillong, Risaw 28
Ka Meghalaya SSA School Association (MSSASA) ha ka Lah Sngi U Blei ka la ïakynduh ïa u Myntri Rangbah ka Jylla, u Conrad K. Sangma ban ïakren halor ka jingshngaiñ ka kam ki nonghikai SSA hapoh ka Jylla.
“Ha ka jingïalang, ngi la ïamir jingmut sani bha haba ïadei bad katto-katne ki jingai jingmut ba la pynkhreh da ka tnad pule-puthi ban wanrah ïa ka mat treikam na bynta ka jingshngaiñ ka kam ki nonghikai SSA hapoh ka Jylla,” ong u President ka MSSASA, Bah Aristotle C. Rymbai.
U Bah Rymbai u la ong ruh ba u Myntri Rangbah u la pynsngew ba ka Sorkar ka la pynleit jingmut bad kan sa shim ïa ka sienjam ka jingmanbha haba ïadei bad kane ka mat bad shen kan sa khot ïa ki nonghikai ban ïakren shuh halor kane ka bynta ha shuwa ba ka Sorkar kan poi sha ka rai kaba khatduh.
“Katkum ka jingïalang kaba la long mynta ka sngi bad u Myntri Rangbah ka Jylla, ngi sngew ba ka long kaba manbha bad kaba tei,” ong u President.
Ha kajuh ka por, u la pynpaw ka jingkyrmen skhem ba ha ki sngi ban wan, ka Sorkar kan sa mih shakhmat bad ka mat treikam haba ïadei bad ka jingshngaiñ ka kam ki nonghikai SSA hapoh ka Jylla kumba la leh ha kiwei-kiwei ki Jylla ha kylleng ka ri.
“Ngi pynpaw ka jingai khublei bad jingsngewnguh ïa ka Sorkar hapoh ka jingïalam jong u Myntri Rangbah haba ïadei bad ka jingai jingmynjur ïa ka jingpynjlan rta na bynta ki nonghikai SSA, kata na ka 37 sha ka 45 snem khnang ba ki lah ban thep kam Sorkar ha ka liang ki kam hikai la ka long ha Lower Primary, Upper Primary, Secondary bad Higher Secondary,” u la ong.
Na ka liang ka MSSASA ka la ai khublei ruh ïa baroh ki Myntri Sorkar na bynta ka jingkyrshan jong ki ïa ka jingdawa ka seng ha ka por ba pynlong ïa ka jingïalang ka Kynhun Myntri ha Resubelpara ha ka 23 tarik mynta u bnai.
Kum ban shu kdew hangne, ka seng ha kine ki khyndiat sngi ba la dep, ka la ïakynduh ïa ki Myntri Sorkar ban pan jingkyrshan haba ïadei bad ka jingdawa jong ki.
