Shillong, Risaw 28
Ka Tata Motors Passenger Vehicles Limited, kaba don ka ophis khliehduh ha Mumbai, ka la soi ïa ka Memorandum of Understanding (MoU) ba ar snem bad ka Meghalaya Rural Bank ha ka 22 tarik u Risaw, 2024. Kane ka jingïatreilang ka long ban pynïoh jingïarap pisa sha ki nongthied kali na Tata Motors PV Ltd.
Ka Meghalaya Rural Bank ka dei kaba ïasoh lang bad ka Sorkar India, ka Sorkar Meghalaya bad ka State Bank of India bad ka don haduh 90 tylli ki branch hapoh ka Jylla.
Kane ka MoU kan pynsuk ban ïoh ïa ka jingïarap pisa na bynta ki nongthied kali ha Meghalaya, kaba kynthup ïa ki kali ba pawnam na Tata Motors kum ka Punch, Nexon, Harrier bad Altroz, kiba paw ha ka jingshngaiñ, jingskhem bad ka dor kaba shongnia. Ka jingshna ïa ki kali ha India (Made in India Concept) jong ka Tata Motors ka la lah ban wanrah ïa ki kali kiba tbit bad shngaiñ ha ka dor kaba ïahap, kaba la pynlong ïa ka kum ka kompeni ba kongsan ha ka ïew kali ha India bad kaba kiew sted ha Meghalaya.
U Indonlang Passah, trai jong ka Frank Motors, ka dealer jong ka Tata Motors PV Limited ha Meghalaya, u pynpaw ka jingsngew kmen ban pynïasoh ïa ki jingangnud ha Meghalaya. Kane ka jingïatreilang kan nang pynkhlaiñ ïa ka jingshakri ïa ki nongthied kali Tata.
