Shillong, Risaw 28
Ka North-Eastern Hill University (NEHU) ka la rakhe ïa ka jingjop kaba khraw namar lai ngut ki nonghikai ba paw jong ka skul-bah ki la ïoh rung ha ka thup ‘Top 2% Scientists of the World’ ha ka jingpynbna kyrdan ba dang shen ba la pynmih da ka Stanford University, USA.
Ki nonghikai bad nongwad bniah ba la ïoh burom jong ka NEHU ki kynthup ïa u Prof. A. K. Chandra na ka tnad pule Chemistry (School of Physical Sciences), Prof. Timir Tripathi na ka tnad pule Zoology (School of Life Sciences), bad ka Dr. Shruti Shukla na ka tnad pule Nanotechnology (School of Technology).
Kane ka jingithuh ka kdew ïa ka jingaiti jong ki ban kyntiew ïa ka jingnang jingstad ha la ki jong ki jong ki tnad pule bad pyni ruh ïa ka bynta jong ka NEHU kum ka jaka pdeng jong ki jingwad bniah kiba thymmai.
Na ka liang u Vice-Chancellor ka NEHU, u Prof. Prabha Shankar Shukla u la pynpaw ïa ka jingsngew sarong halor kane ka jingjop, da kaba ong, “Ka jingpynrung ïa ki nonghikai jong ngi ha ka thup ‘Top 2% Scientists of the World’ jong ka Stanford University ka long ka jingpynshisha ïa ki kyrdan ba hakhlieh duh jong ka jingwad bniah bad buit thymmai ïa kaba la kyntiew ha NEHU.”
Shuh shuh u la bynrap ba ka jingtrei jong kine ki stad saïan ka pyni ïa ka jingaiti jong ka skul-bah ban noh synñiang sha ki jingkiew ha ka liang ka ‘Science’ ha kylleng ka pyrthei.
“Ka jingïoh jingithuh jong ki ka long ka jingpynpaw ïa ka thong kaba kham ïar jong ka NEHU ban pynshlur ïa ka jingtbit ha ka jingwad bniah, kumjuh ban ai mynsiem ïa ki pateng ban wan jong ki ‘riewstad,” ong u Prof. Shukla.
