Nongstoiñ, Risaw 28
“Ngin ong em ïa u drok, ïa u drok ngin rat dyngkhong, ngin nym sangeh ïa ri lajong ngin ri kyndong, sawa ka sur ha ka jingpyrta jong ki dkhot bad ki Nongïalam ka Hynñiew-trep Youths’ Council (HYC) West Khasi Hills District ha ryngkat ki longkmie longkpa, ki khynnah skul ha ka Lah Sngi U Blei jong ka taïew ha ka jingïashim bynta ha ka jingïaid paidbah ba la pynlong da ka HYC ha sor Nongstoiñ.
Ka phang pdeng jong kane ka jingïaid paidbah ka long kum shibynta ban pynduh ïa u drok bad ka jingpyntreikam ïa ka jingangnud ban wanrah ïa ka jingkylla (Drugs Elimination and Enforcement of Dream) kaba dei ka mishon jong ka HYC ban ïakhun pyrshah ïa ka jingjyllei jong u drok.
Ïa kane ka jingïaid paidbah la sdang naduh jan SBI Nongstoiñ Branch bad la pynkut ha ïew Nongstoiñ Complex da ka jingïalang.
U samla Roykupar Synrem, President ka HYC Sengkmie haba kren ha ka jingïalang u la ong, balei ka HYC ka hap leit kylleng ki jaka ban ïalap bad ban kren ïa ki mat jingdawa ha kaba ïadei bad ka jingjyllei jong u drok.
U la ong bad pynkynmaw ruh ba lai snem kum ka jylla ka la mad ka jingsohsat na ka jingpang khlam COVID-19. Ha kine lai tylli ki snem ki nongshong shnong ka Jylla Meghalaya kiba la ïoh ïa une u jingpang ki don kumba 97 hajar ngut. Hynrei lada phai pat sha ka jingma kaba wan na u drok tang ha ka shi snem ka la kiew kumba 1 lak ha u snem 2023, ki nongpang lane ki briew kiba la ngop ha u drok ki don kumba 2 lak bad ha u snem 2024 ka jingdon jong ki briew kiba la kyrni ha u drok ka la poi sha ka 3 lak ngut.
“Ngi tieng ban pyrkhat ba lada kane ka jingkiew jong ki briew kiba pang lane kiba la ngop ha ki jingdih ïa u drok kan ïai bteng lada ngin nym shim kano-kano ka lynti ban khanglad lane ban teh lakam, ngi tieng ban pyrkhat ba ka jaidbynriew kaba tang shitroh kan jia aiu,” ong u samla Roykupar bad bynrap ba halor kata ka nongrim ka HYC ka la rai rangbah bad kum ki Nongïalam bad ki dkhot jong ka seng ba kan ong ban mih sha madan ban ïakhun ïa kane ka khlam jong u drok.
U samla Roykupar u la ong ruh, “Ngi sngewthuh shai ba kane ka jingwan rung jong u drok ha kane ka ri ka jong ngi ka lah ban dei ruh ka buit poh jong ki briew kiba nabar kumno ban pyntlot bor ïa ka jaidbynriew Hynñiewtrep jong ngi.”
“Ngi khot ngi wer ïa ki kmie ki kpa kiba don ïa ki khun ki barit ki bym pat ngop ha ka jingkyrni ïa u drok, ki bahaïing bahasem, ki nongshong shnong ba phin ai ïa ka jingkyrshan ka jong phi khamtam eh ha ka 7 tarik u Naiwieng 2024 ba ngin sa pynlong ïa ka jingïalang ïaid paidbah sha ka ophis jong ki shakri paidbah kaba ngi la jied, ban leit ban dawa ïa ki 7 tylli ki mat kiba ngi la dep ban buh hakhmat ka Sorkar. Ngi kyrpad ïa phi ban ïa mih ban pyni ba kum ka jaidbynriew ngi long kawei na ka bynta ban khanglad ban ïoh rung laitluid jong u drok,” ong u samla Roykupar.
Ha katei ka sngi la donlang ruh u Rev. S.B Marngar, samla Lumlang Kharsyiemlieh President HYC West Khasi Hills District, samla Rhembor Saibon General Secretary HYC Sengkmie, samla Donboklang Kharlyngdoh Vice President HYC Sengkmie lem bad kiwei kiwei.
