Leh bym patiaw ka Sorkar khlem maramot shuh ïa ka surok kaba la tih na Motphran sha lad Umsohsun

Shillong, Risaw 28

Wat lada ki paidbah ki la pynsngew halor ka jingsniew ka surok kaba la tih na Motphran ter ter sha lad Umsohsun khlem mara -mot shuh, hynrei ka Sorkar ka leh bym patiaw bad ym pat ïohi dak ba kan bthah ïa u kontraktor ban maramot noh.

U Nongsaiñ Hima dang shen u la pyni ïa ka khubor halor kane ka surok kaba la dep tih ban tep pipe naduh u snem ba la dep, hynrei ym shym la maramot shuh haduh mynta.

Ha kylleng ki jaka, ka Sorkar ka ju tih ïa ki surok khamtam haba donkam ban tep ïa ki pipe um bad ki kynja waïar kiba hap ban pynïaid lyngba ki surok ha kylleng ki shnong. Hynrei hadien katto-katne por, ki kontraktor ki ju maramot noh biang ïa ka surok kaba la tih.

Ki don ki surok kiba tih da ka tnat PHE ban pynïaid ïa ki pipe um bad ki don ki surokbah bad surok shnong kiba tih da ki kompani kiba pynïaid ïa ki waïar hadien ba la ai jingbit ka tnat shna surok (PWD Roads).

Ki nongñiah kali bad ki paidbah ki la buh jingkylli balei ka tnat PWD ka sngap jar bad kam bthah ïa u kontraktor uba dei ban maramot ïa kane ka surok kaba la thliew bha naduh Motphran ter ter sha Bimola haduh lad Umsohsun.

La antad ba ka jingpynslem ban maramot ïa ka bynta jong ka surok kaba tih bad pynjot ka dei namar ba u kontraktor uba ïoh ïa ka kam, u la leh klet namar ym don ba ujor ne pynsngew sha ka Sorkar.

Ki paidbah ki la kyntu ïa ka Sorkar ba kan bthah noh mardor ïa u kontraktor ban maramot noh ïa ka bynta jong kane ka surok kaba tih bad kaba kylla thliew wat hadien ba la dep pyndap mawria kham mynshwa.

La ïohi ruh ba ki don ki bynta ka surok kiba la kham heh ka thliew bad buh jingma ym tang ïa kiba ïaid lynti hynrei ïa ki kali ruh kumjuh.