Shillong, Risaw 29
U Myntri Khynnah ka Sorkar Pdeng ba khmih ïa ka tnat kam bar ri u Pabitra Margherita ha ka Sngi Ba-ar u la aiti ïa ka shithi thung kam sha 207 ngut ki nongïoh kam ha ka jingïalang jong ka Rozgar Mela kaba la pynlong da ka tnat Post, North East Circle.
U Pabitra Margherita u la aiti ïa ki shithi thung kam sha 191 ngut ki nongtrei bathymmai ha ka tnat Postal, 15 ngut ha ka Railways bad 1 ha ka NIT Meghalaya.
Ha ka Rozgar Mela kaba la pynlong ha Shillong, da ki spah ngut ki samla kiba la shah thung kam thymmai na Meghalaya, Manipur, Nagaland, Mizoram, Tripura, bad Assam ki la ïalum lang ban rakhe ïa kane ka mawjam, kaba pyni ïa ka jingshimkhia jong ka Sorkar Pdeng ban kyntiew ïa ka ïoh kam ïoh jam ki khun samla.
Haba kyntu ïa ki samla ban aiti lut ha ka jingshakri jong ki ha la ki kam, u Myntri Khynnah u la ong, “Kane ka sngi kam dei shaphang ka jingkheiñ-jingdiah, ka dei shaphang jong phi. Phi dei ki nongmihkhmat jong ka jingthmu ka Sorkar jong ngi na ka bynta ka ri India. Ka jinglong ba janai bad ka jingaiti jong phi kan long ka nongrim jong ka jingroi ki jaidbynriew jong ngi”.
Ïa kane ka Rozgar Mela la pynlong ha ki 40 tylli jaka ha ka ri India ban sam ïa ki shithi thung kam sha ki samla ba dang shu shah thung kam ha ki tnat bapher bapher jong ka Sorkar Pdeng, kynthup ïa ka tnat lum khajna, ka tnat pule puthi, ka tnat kam pohïing, ka tnat ïada ri, bad ka tnat jong ka koit ka khiah nalor kiwei kiwei.
Ha kane ka sngi, u Myntri Rangbahduh ka ri u Narendra Modi u la sam palat 51 hajar tylli ki shithi thung kam lyngba ka video conferencing.
Haba kren bad ki lad pathai khubor, u Margherita u la ong, “Nga sngew sarong ban ïohi ba da ki spah ngut ki samla kiba jop ki la ïalum lang, kiba kwah eh ban pdiang ïa ki kam thymmai jong ki. Ka pyndap ïa nga da ka jingkmen ban sakhi ïa ki kyrtong kiba pynpaw ïa ka jingsngewnguh ïa ka jingpyrshang jong ka Sorkar”.
“Ym tang kum u Myntri hynrei kum u nongshong shnong ka ri India, nga sngew sarong shibun ban sakhi ïa kane ka jingkiew ha New India, katba ngi ïaid sha ka lynti jong ka roi ka par,” u la ong.
U Margherita u la ong ba ka Rozgar Mela ka pynpaw ïa ka jinglong nongïalam ba don jingïohi jngai jong u Myntri Rangbahduh ka Ri u Narendra Modi, uba ka jingbuddien jong u, ïa ka Atmanirbhar Bharat ka pynkhih ïa ka jingïaid lynti jong ka roi ka par jong ka India.
