Shillong, Risaw 29
Ka Khasi Students’ Union (KSU) Bangalore Unit ha ka 29 tarik u Risaw 2024 ka la leit ban ujor da ka ejahar ha ka ophis u Superintendent of Police (SP) ka East Khasi Hills District pyrshah ïa kawei ka samla Khasi kaba dei ka samla kaba shong ba sah ha Bangalore kaba ju kren beiñ bad krenpoh ïa ki Khasi lyngba ki rynsan ‘social media’ tad haduh ba ka la pynlong ïa ka seng ba kan ym lah shuh ban sngap ïa kine ki jingleh jong katei ka samla.
Haba ïoh ban ïakren bad u samla Donboklang Nongphud, President ka KSU Bangalore Unit hadien ka jingwan ai ïa ka ejahar ha ka ophis u SP, u la ong ba kane ka jingwan ai ejahar jong ka seng ka dei namar ka jingbym lah shuh ban sngap halor ka jingleh jong kane ka samla na ka por sha ka por khamtam kaba la pynthohbria ïa ka jaidbynriew Khasi bad ruh ïa ki samla Khasi kiba leit ban pule sha Bangalore namar ka jingleh jong ka marwei ka la pynlehraiñ lut ïa baroh ki para samla Khasi.
“Ka la leh shaba palat bad ka la pynthohbria shaba palat ïa ka jaidbynriew khamtam ïa ngi kiba pule shathie sha Bangalore ruh khamtam ïa ki kynthei. Ka jingleh jong ka marwei ka la pynlong ban shah kynnoh lut”, ong u samla Donboklang.
U samla Donboklang u la ong ba na ka liang ki nongïalam ka KSU Bangalore Unit kim banse ban wan shaduh sha Shillong ban wan buh noh da ka ejahar pyrshah ïa kane ka samla kum ka jingsneng ïa ka jingmlien jong ka.
Na ka liang ka seng ka la pynshai ruh ba kane ka samla kaba sah ha Bangalore kam dei kaba leit pule hynrei ka dei kaba shu wan ban bylla.
Shuh shuh na ka liang ka seng ka la ong ba wat la kam kwah ban ujor da ka ejahar pyrshah ïa katei ka samla hynrei namar ka jingïai mlien jong ka na ka por sha ka por ban kren da ki kyntien kiba pynthohbria bad pynlehraiñ ïa ka seng, kaba la pynlong ïa ka seng ba kan ym lah shuh ban sngap. Kumta ka la hap ban shim noh da kane ka sienjam ban ujor noh da ka ejahar pyrshah ïa katei ka samla khnang ba kan long kum ka jingsneng bad jinghikai ba kan nym mlien shuh ban kren tohmet ne pynthohbria ïano-ïano nangne shakhmat.
“Ngim lah shuh ban sngap, kumta ngi hap ban wan shapoh Shillong ban ujor noh da ka ejahar ha u SP bad ka jingwan ujor jong ngi ka long kum ka jingai jingsneng ïa ka”, bynrap u samla Donboklang.
Shuh shuh ki nongïalam ka seng ki la ong ba kim peit ne tuklar ïa ka kam shimet jong ka hynrei kum ka seng ka wan ban ujor ejahar ka dei halor ka nongrim ba kane ka samla ka ju mlien ban kren beiñ shaba palat ïa ka seng bad kumjuh ïa ki jaidbynriew Khasi.
