Shillong, Risaw 12
Hadien ka jinghiar kynsan ha u bnai Nailar bad Nailur hadien ka jingjia ha ka 19 tarik u Nailar, ka ‘Hospitality Sector’ jong ka Shillong ka la sakhi ïa ka jingkhie im pat ha kaba ki nongjngohkai pyrthei ki la sdang ban wan tuid biang bad ka ‘Booking’ ruh jong u bnai Risaw ka la nang kiew.
U President ka Federation of Shillong Hotel (FSH), u Paramvir Singh ha ka Lah Sngi U Blei u la ong ba kane ka tnad ka la shah ktah la ar bnai mynta hynrei mynta ka la don ha ka lynti jong ka jingkhie im.
“Ka la don ka jinghiar bad ngi la mad jingeh ha u bnai Nailar bad Nailur baroh kawei hynrei mynta kiei-kiei ki la nang manbha, kiei-kiei ki la kham bha. Ki nongjngohkai pyrthei ki la sdang wan biang, ka la biang mynta,” la ong u Singh.
U la ong ruh ba ka synrai ka la wan.
“Naduh u bnai Risaw shakhmat ka long kaba manbha, ka aïom ka la wan. Ngi khmih lynti ba ki ‘Booking’ kin biang ha u bnai Risaw. Kine ki dei kiba la leh lypa, ka jinglong-jingman ka la biang mynta, ki briew ki la wan,” u la ong.
Haba ïadei bad ka jingbitar hapdeng ki nongjngohkai pyrthei na Assam hadien katei ka jingjia, u Singh u la ong ba ka jinglong-jingman ka la manbha mynta.
Shuh shuh u Singh u la ong ba ki pulit ki la pynlong kongsan ïa ki ‘Hotel’ bad ki ‘Homestay’ ban buh ïa ki ‘CCTV’ ha ki jaka paidbah bad ha ki jaka rung.
“Ka la long kaba donkam ïa baroh ki ‘Homestay’ bad ki ‘Hotel’ ban don ïa ki ‘CCTV’ ha ki jaka paidbah bad khamtam eh ki bynta ba kdew shabar na ka jaka rung. Ka la long kaba donkam bad ngi kyntu ïa baroh ki nongpynïaid ‘Hotel’ bad ki ‘Homestay’ ban buh ïa ki,” u la ong haba sot ïa ki jingtip na u SP.
