Shillong, Risaw 12
Ha ka por ba ka kyrdan jong ka NEHU ha ka ri baroh kawei ka la hiar na ka 15 sha ka 151-200 ‘band’, ki seng samla pule ki la phah jingthoh sha u Lat ka Jylla, u C.H. Vijayashankar na ka bynta u Vice-Chancellor (VC) uba pura bad uba tip bha shaphang ka skulbah.
Ha ka kyrwoh ba la ïasoi lang, ka NEHUSU bad ka KSU-NEHU Unit ki la ong ba ka NEHU, kaba la seng katkum ka aiñ jong u snem 1973 ryngkat ka jingbthah ba kyrpang na ka bynta ka Thaiñ Shatei Lam Mihngi, ka don ïa ka pateng bad ka sap ban khie im biang hynrei ka duna ïa ki nongïalam kiba skhem jingmut bad kiba don ka jingkitkhlieh.
Haba pynkynmaw ïa ka jingshah thngan ba khlem buh por jong ki samla pule ha u bnai Naiwieng, 2024 halor ka jingtreikam ki bor ba dei khmih, ki jingthung kam bad ki jingdonkam ba kongsan, kine ki 2 seng ki la ong ba ki jingeh kiba ju jia na ka por sha ka por ha ka liang ka synshar-khadar, ki jingtei bad ka bor briew hapoh ki VC kiba wan ba leit ka la ktah shi kat dei ïa kane ka shlem pule.
Ki la kdew sha ka kyrdan jong ka NIRF: ka kyrdan kaba 15 ha u snem 2016 sha ka kyrdan kaba 151-200 ha u snem 2025, da kaba ñiew ïa kane kum ka jingkylla kaba donkam ïa ka jingphai khmat bad ka jingpyrkhat.
Na ka liang kine ki 2 seng, ki la maham ruh ba ki jingpynkylla bathymmai hapoh ka NEP – FYUP, ITEP bad ka PG kaba shisnem – ki shah pynbor ban ïaid shakhmat khlem ki kamra klas kiba biang, ki nonghikai bad ki jingdonkam kiba biang.
Kaei kaba ka NEHU ka donkam mynta, ki la ong, ka dei u VC uba don “ka kyrdan pule kaba biang, ka jingshemphang ha ka jingpynïaid kam kaba la pynshisha, ka jinglong ba janai, ka jingïohi jngai bad ka jingkut jingmut kaba shisha ban pynkhlaiñ ïa ka shlem pule” bad uba tip bha ïa ka jinglong-jingman jong ka NEHU bad ka bynta ba ïadei bad Thaiñ Shatei Lam Mihngi.
Kane ka jingthung, ki la ong, ka dei ban pyni nuksa ïa ka lynnong bathymmai kaba la tei halor ka jingtbit jong ka pule-puthi, ka bha ka miat jong ki samla pule bad ka jingburom ïa ki jingsngew jong ki nongshong shnong – “ka skulbah ha kaba ka jingïakren ka treikam hashuwa ba ka jingïakhih kan long kaba donkam.”
