Shillong, Risaw 12
Ki jinghikai kan shah ktah ha ki skul deficit ha kylleng ka Jylla, namar ba ki nonghikai bad ki nongtrei kin sdang ban shim shuti kaba lai sngi lynter, ka ban sdang naduh ka 13 tarik u Risaw haduh ka 15 tarik u Risaw 2026.
Ka Khasi Jaiñtia Deficit School Teachers’ Association (KJDSTA) bad Garo Hills Deficit School Teachers and Employees Association (GHDSTEA) ki la ong, ba ki dangïaid shakhmat bad ka jingïakhih hadien ba ka jingkren ka Sorkar ka paw ba kam don jingmut eiei.
U President ka KJDSTA u Bah Boswell Pala u la ong ba ka jubab jong ka Sorkar kaba la ai ha ka 08 tarik u Risaw 2026, na u Joint Secre-tary ka tnad pule puthi, u Bah D. Lyngdoh, kam shym la kren eiei ha ka ‘memorandom’ jong ki kaba ki la phah myn ha ka 25 tarik u Nailar 2026, kaba ki la ai sha u Myntri Rangbah ka Jylla, u Conrad K Sangma.
Ki jingdawa ba hakhmat jong ki, ki kynthup ban weng noh ïa ka scheme 2026 bad ban pynphai biang ïa ka Board of Trustees (BOT).
Ha ka jaka ban weng noh ïa katei ka skhim, ka shithi ka la bthah ïa ki nonghikai ba kin pynrung kyrteng ha ka PRAN na ka bynta ban pyntreikam ïa ka Scheme 2026, la ong u Bah Boswell.
Haba ïadei bad ka BOT, u la ong ba ka Sorkar ka la tyrwa ban kynthup ïa ki nonghikai deficit ha ka board ba la thaw ha ka 27 tarik u Ïaïong 2026, ïa kaba ka seng ka la kyntait.
U la ong ba ki ar tylli ki seng ki shem ba ka jubab ka Sorkar kam long kaba lah ban pdiang bad ki la rai ban ïaid beit shakhmat bad ka jingïakhih, katba ka Sorkar ka dangplie ka jingkhang ban ïakren.
“Ki seng kin long ba la kloi beit ban buh biang ki mat jingdawa sha ka Sorkar,” la ong u Bah Boswell, da kaba kyrpad ïa ka jingïatreilang na ki nonghikai bad ka jingsngewthuh jingmut na ki kmie ki kpa bad kumjuh ruh ki khynnah skul.
