Shillong, Risaw 12
Ka Dangar Dombah Government Lower Primary School ka la pynhap pyrda ïa ka jingpynkut ïa ka jingrakhe ïa ka jubili ksiar jong ka, kaba kynmaw ïa ka jingdap 50 snem ka jingnoh synñiang jong ka sha ka pule puthi bad ban kyntiew ïa ki samla pule.
U Myntri ka tnad pule puthi ka Jylla Bah Lahkmen Rymbui u la ïashim bynta ha kane ka jingrakhe bad pyllait paidbah ïa ka souvenir jong ka jingdap 50 snem ka skul, kaba thoh ïa ka histori, ki jingjop bad ka jingïaid lynti jong ka ha kine ki sanphew tylli ki snem ba la leit noh.
Ha kane ka prokram la don lang u Bah HM Shangpliang, u nongaibuit jong ka Sorkar Meghalaya lyngba ka tnad pule puthi; u Rev. R.M. Thongni, uba dei u Principal jong ka Riwar Secondary School ha Dangar; u Fr. James Mawa, Principal jong ka St. Peter’s Higher Secondary School, Dangar, ki khlieh nonghikai jong ki skul, u rangbah shnong Dangar; ki nongmihkhmat na ki shong bad ki dong ba marjan nalor ki kmie ki kpa, ki nonghikai bad ki khynnah skul.
Ki nonghikai barim ki la ïasam ïa ki jingkynmaw jong ki bad ki la pynkynmaw shaphang ka jingroi bad jingïaid lynti jong ka jaka pule ha kine ki sanphew tylli ki snem. Kane ka skul mynta ka don kumba 290 ngut ki khynnah bad ka dang bteng ban ai jinghikai tynrai ïa ki khynnah ha katei ka thaiñ.
Haba ai jingkren ha ka jingïalang, u Bah Lahkmen Rymbui u la pynpaw ïa ka jingpyrshang jong ka Sorkar Jylla ban pynkhlaiñ ïa ka bynta jong ka pule puthi lyngba ka jingpynbha ïa ki jingtei jong ki skul, ka jingkyrshan ïa ki nonghikai bad ki lad jingpule kiba kham bha na ka bynta ki khynnah skul. U la pynpaw biang ïa ka jingkular jong ka Sorkar ban pynthikna ïa ka jingpule kaba bha bad ban pynlah ïa ki khynnah ban pynroi ïa la ka jong ka sap.
U Myntri u la ïaroh ïa ki nonghikai kiba la aiti lut ha ka ban hikai bad pynheh pynsan ïa ki khynnah skul. U la ai khublei ruh ïa ka jingnoh synñiang jong ki bor pynïaid ka skul bad ai khublei ïa ki kmie ki kpa kiba la buh ïa ka jingshaniah ha kane ka jaka pule.
Haba pynshlur ïa ki khynnah ban pyndonkam hok ïa ki lad ki lynti kiba ki don, u Bah Lahkmen u la pynpaw ïa ki jingthmu bapher-bapher jong ka Sorkar kiba ïadei bad ka jingpynroi ïa ki sap, ka jingithuh ïa ki sap bad ka jingroi jingpar shimet. U la ban jur ba ka jingpule ka dei ban ïaid shabar jong ka jingpule ha ki kamra klas bad ban pynkhreh ïa ki samla da ka jingtip bad jingshemphang nalor ka jingnang jingstad, ka jingtbit bad ka jingshaniah ban ïakynduh ïa ki jingeh kiban sa wan bad ban noh synñiang kaba don jingmut sha ka imlang sahlang.
La pynphuh pynphieng ïa kane ka sngi da ki jingshad kaba la ai da ki khynnah skul.
