Shillong, Risaw 12
U Myntri Rangbah ka Jylla Meghalaya u Conrad K. Sangma u la ong ba ka thong jong ka Sorkar Jylla ka long ban tei ïa ka imlang sahlang bad ban nangpynïar ïa ka seng kam seng jam ban tip ïa ki samla kiba don ka jingstad bad ba lah ban pynurlong ïa ki sap jong ki.
Haba ai jingkren ha ka Chief Minister’s Youth & Innovation Summit 2026 ha Shillong, u la kdew ba ki don bunjait ki prokram bad ki jingïakop bapher-bapher haba ïadei ka seng kam seng jam bad pynshlur ïa ki nongbei tyngka ban phai khmat sha ka Meghalaya.
Ha kane ka sngi u la pynbna ïa ki nongjop ha ka jingïakop ba la tip kum ka Chief Minister’s Business Catalyst (CM BC), u la pyllait paidbah ruh ïa ka Chief Minister’s Innovation Contest 2026 bad ka PRIME Digital Service Provider Platform (PRIME DSPP) bad u la aiti ruh ïa ki song pisa sha ki nongïoh myntoi lyngba ka PRIME.
Kum shi bynta jong ka CMBC Challenge, ki samla pule na ki kolej bad ki skulbah bapher-bapher ki la pynpaw ïa ka rukom treikam jong ki, ïa kaba la bishar bniah da ka kynhun bishar. Kiba la shah jied ki kynthup kiba shna sabon da kaba pyndonkam na ka umphniang ba la dep pyndonkam, ka jingpynmih sboh na ki jaboh jabaiñ jong ka ïewduh, ki jaka buh ban pynneh ïa u shyrmit lakadong bad u soh niamtra bad u jingdih kophi ba la pynmih na Mawkyrwat.
Ka PRIME Digital Service Provider Platform (PRIME DSPP) ka dei ka lad ai kam ïa ki khun samla ba la pyntbit ha ki liang bapher-bapher bad ban ai ka jingshakri haduh ki khyrdop ïing jong ki nongshong shnong da kaba pyndonkam ïa kane ka lad ba katkum ka juk ba mynta.
Lyngba kane ka lad ki briew ki lah ban ïoh ïa ki briew kiba la pyntbit ha ka kam, kum ka kam ‘plumbing’, ka jingpynkhuid kamra, ka jingshakri ha ki dukan khapshniuh, kam thaiñ jaiñ bad kumta ter-ter.
Haba kdew ka jingroi jong ka tnad IT ha ka Jylla, u Myntri Rangbah ka Jylla u la ong ba ïa ka IT Park kaba ar, kaba dang shu plie shen, la ai pura sha ki kompeni bad ki la pan ïa ka bynta kaba lai. “Ka jingsted kaba ngi ïohi ba ki kompeni IT ki wan rung, ki bei tyngka ha Meghalaya bad peit ïa ki briew jong ngi ban leh ïa ki jait kam bapher-bapher, ka long shisha kaba phylla” u la ong.
