Shillong, Risaw 12
U Myntri Rangbah ka Jylla Conrad K Sangma ha ka sngi Nyngkong u la buh ïa u mawnongrim ban tei ïa ka Mini Secretariat ha Patharkhmah bad pyntip ba ka Sorkar Jylla kala kynshew haduh T.1,847.38 klur ka pisa na ka bynta ki projek bapher-bapher ban pynroi ïa ka Ri-Bhoi khamtam ha Western Ri-Bhoi.
Ïa u mawnongrim la buh ha ka jingïalang ba la ïadonlang u Myntri ka Sorkar Bah Sosthenes Sohtun uba dei ruh u MLA ka thaiñ, MDC ka Nongpoh lem ki ophisar bad kiwei-kiwei.
Ha kane ka sngi la plie ruh ïa ka ophis bathymmai ka Jirang Block da ka nongïalehkai phutbol ba pawnam ka Jirang ka Ribansi Jamu bad kumjuh ruh la plie ïa ka Building ba thymmai ka Patharkhmah Senior Secondary School bad ka Patharkhmah Model Degree College. Ka Jirang C&RD Block ka dei kaba la pynkha ha ka 24 tarik Lber, 2001 bad ka headquarter ka don ha Patharkhmah. Ïa u mawnongrim jong ka Block Integrated Development Complex ba thymmai la buh ha ka 27 tarik Risaw, 2023 kaba ai sha ki ophisar ka Block ïa ka jingtreikam kaba paka. Ka Sorkar kala kynshew pisa ban shna pynbha ïa ki Block Office ha kylleng ka Ri-Bhoi. La pyntip ruh ba ka Sorkar kala pyntrei haduh 184 tylli ki projek ba shongdor palat T.1 klur kawei, kiba la mang pynlut baroh lang haduh T.1,847.38 klur ha kylleng ka Ri-Bhoi bad napdeng kine, 14 tylli ki dei kiba la dep ban pyntrei, 109 tylli kiba dang pyntrei bad 61 tylli kiba dang sdang.
Bun na kine ki projek ki dei kiba ha Western Ri-Bhoi ba kynthup ïa ka jingkieng steel ba T.16.58 klur ha ka surok Patharkhmah, ka surok sha Patharkhmah Model Degree College ba T.3.51 klur bad ka Jirang Primary Health Centre ba T.1.26 klur.
Haba kren ha ka jingïalang, u Conrad u la pynpaw, “Ka long kaba sngewhun ban ïohi ba ki Block Office ha kylleng ka Jylla kiba ju treikam na ki ïingwai bad ki jingtei bala rim, kila ïoh ïa ki ophis thymmai bad bapaka,” u la ong. U la ong ba ka jingbuh mawnongrim na ka bynta ka Mini Secretariat ha Patharkhmah ka ïai ban ïa ka jingkut jingmut jong ka Sorkar ïa ka synshar khadar ka juk bad kaba kloi ban ïarap ïa ki paidbah. “Ka Mini Secretariat kaba la buh mawnongrim mynta ka sngi kan wanrah lang ha kawei ka phyllaw ïa ki ophis jong ka Patharkhmah Civil Sub-Division khnang ba ki nongshong shnong kin lah ban pyndep ïa ki kam jong kawei pa kawei ka ophis tang ha ka shisien wan ha ka jaka ban leit na kawei ka jaka sha kawei pat,” ong u Myntri Rangbah.
“Ki paidbah kim dei ban hap ïaid da ki kynta-kynta lane da ki sngi ban ïoh ïa ka jingshakri jong ka Sorkar bad ka bor synshar ka dei ban wan shajan jong u paidbah,” u la ong haba kyntu ïa ki ophisar ba kin ai ka jingshakri da ka jingsngewrit bad ka jingisynei. U la kyntu ruh ïa ki kynhun ba shakri ïa ka imlang sahlang ba kin ïadon bynta lang ha ki kam ban wanrah ïa ka roi ka par.
Ka Patharkhmah Model Degree Committee ka dei ka degree college ba nyngkong eh jong ka Sorkar ha Ri-Bhoi, kaba la seng ha ka 25 tarik Jymmang 2022 hapoh ka Rashtriya Uchchatar Shiksha Abhiyan (RUSA), bad ïa ka campus la plie paidbah hynne ka sngi.
Haduh mynta, bun ki samla pule ka Western Ri-Bhoi kiba pyndep ïa ka klas XII ki hap ban leit sha Nongpoh, Shillong lane Guwahati ban ïoh degree bad bun ki longïing kim lah ban kyrshan ïa ka jinglut ha ka leit ka wan, ka bai wai ïing bad ka bam ka dih.
Kane ka College ka ïeng ha ka jaka ba 10.09 acre hapoh ka Jirang C&RD Block bad ka dei kaba la pynïasoh ïalade sha ka Captain Williamson Sangma State University bad ka tyrwa ïa ki undergraduate course ha ka Arts.
