Shillong, Risaw 29
Ka jingpynbna ka Sorkar Jylla ban pynkiew noh ïa ka Dearness Allowance (DA) na ka 43% sha ka 46% ka la pynmih ïa ka jingkylli la kane ka jingpynbna ka pynkheiñ ne em ïa ki kyndon pyrkhing ilekshon (Model Code of Conduct) kaba dang treikam namar ka ilekshon MLA shiteng samoi ha Gambegre konstitwensi ha West Garo Hills district.
Ban sngewthuh kham bha la kane ka jingpynbna ka long pyrshah ïa ki kyndon pyrkhing ilekshon, la pule ïa ki kyndon kiba ka Election Commission of India ka la buh haba pyntreikam ïa ka Model Code of Conduct (MCC) ha ki ilekshon shiteng samoi.
Ha kaba ïadei bad ka jingpynkiew ïa ka DA, ka ECI ka la kdew ba ka jingpynbna jong ka Sorkar Jylla ïa ka DA ka dei ban long kumba ju dei ka kamram ban leh, bad ym lah satia ban pynphriang paidbah ba ka dei ka jinglah jong ka Sorkar ban pynurlong (government’s achievement).
Katkum ka jingpynbna kaba la pynmih ha ka Lah Sngi U Blei (28 tarik Risaw, 2024), la pyntip ba ka Sorkar Jylla ka la pynkiew ïa ka DA jong ki nongtrei Sorkar na ka 43% sha ka 46% ka ban treikam naduh ka 1 tarik Naitung, 2024.
Hynrei ha kane ka jingpynbna, ka Sorkar ka la ong ba kane ka DA kaba la pynkiew kan pynmyntoi ïa kumba 90 hajar ngut ki nongtrei Sorkar bad kito kiba la shongthait na ka kam ha kane ka Jylla baroh kawei.
