Shillong, Risaw 29
Watla ka jingtei ïa ka Ïingdorbar Thawaiñ kaba thymmai ha Mawdiangdiang ka la nang ïaid, hynrei ki kam maramot jong ka Assembly ha Khyndai Lad ki ïaid khlem sangeh.
Ki kam maramot bad ki jingtei jingshna ki khlem sangeh shuh ha Khyndai Lad naduh ki snem kiba mynshwa haduh kat mynta naduh ka jingtah maw marble (tiles) ïa ka kynroh baroh sawdong haduh ka jingsiang ïa ka phyllaw ka Assembly bad kiwei-kiwei ki kam maramot kiba ïai bteng.
Mynta ka sien, la ïohi ba ka Assembly ka la pynpra noh sa ïa ki maw marble kiba la tah pynitynnad baroh sawdong ka kynroh jong ka Assembly dang ha kine ki khyndiat snem, hynrei mynta la pynkhreh thymmai noh da kawei pat ka rukom shna ïa ka kynroh.
Kine ki kam maramot ki dei kiba don ka jinglut ym ba shu ïarap pynshna lem da mano-re-mano.
Ïa ka phyllaw jong ka Assembly kaba la siang da ki kynja mawit ha ki snem ba la leit, la weng noh ha u snem ba la dep ha kaba la siang noh da ka surok rong.
Kumne man ka por ki mih beit ki kam maramot ha Assembly khlem kut shuh, bad ym tip satia la ka dei kaba donkam shisha ban leh ne ka dei kaba la leh tang ban ïoh ai kam ïano-re-ïano bad kaba long pynban tang ka jingpynlut kai ïa ka pisa paidbah.
Ka Jylla haduh mynta kam pat ïoh da kawei ka Ïingdorbar Thawaiñ kaba thymmai mynta la palat 20 snem hadien ba ka Ïingdorbar barim bad kaba itynnad bha ha Khyndai Lad la bamduh noh ka ding ha ka jingpluh kaba la jia ha ka 9 tarik Kyllalyngkot, 2001.
