Shillong, Risaw 29
Ka jingshah tuh jong kawei ka ar shaka ka la pynlong ïa ki pulit ym tang ban ïoh noh tang ïa kane kaba shah tuh hynrei sa ïa kawei pat bad ar tylli ki pump um (water pump) kiba la shah tuh.
Katkum ka khubor na ki pulit la ong ka la don ka jingujor ha ka 27 tarik mynta u bnai ba ki runar bym lah ban ithuh ki la tuh ïa kawei ka ar shaka kaba don ïa u registration number ML08-E-5458 jong u Pangseng Sangma na Mikisi View Point ha West Garo Hills.
Ha ka jingtohkit kaba la pynlong, la lap noh ïa katei ka ar shaka kaba la shah tuh ha ryngkat bad kawei pat kaba don ïa u registration number AS17-D-3309 kaba dei jong u Bante M Marak bad ar tylli ki pump um bad kiwei na ka thaiñ Ampanggre ha West Garo Hills. La ong ba kham hadien ïa kane ka ar shaka kaba don ïa u number ML08-E-5458 la aiti noh sha u trai jong ka, katba ïa katei kawei pat dang buh hapoh ka Rongram OP kat bym pat lap trai.
