Shillong, Risaw 29
Ki bahaïing jong ka Kong Nieñsidalin Riahtam, 45 snem ka rta bad ki bahaïing jong i heprit ba dang 5 snem ka rta, ki kwah ba ki pulit kin kem ïa kiba donkti ban pynïap ïa kine ar ngut hadien ba ki la ïoh ïa ka kaiphot ba ka met jong ki, ka don ki dak mong.
Ha ka jingbuddien u nongthoh khubor la ïoh ban ïakren bad ki bahaïing kiba la rai ban ïaid beit shakhmat ban buddien haduh ban da ïoh kem ïa kiba donkti namar kim kwah ba kine ki briew kiba leh kin lait da kaba suk.
Ki la ïathuh ba naduh ba la lap ïa ka met ha ka 19 tarik Nailur, 2024 ki bahaïing ki la leit ai da ka ejahar ha thanat Mawlai ha ka 20 tarik Nailur, 2024 namar ki suba jur ba ka jingkhlad jong ki ar ngut ka dei ba don ki briew kiba pynïap.
Ki la ïathuh ba ïa ka kaiphot ‘post mortem’ na NEIGRIHMS la ïoh ha ka 25 tarik mynta u bnai Risaw 2024.
Haba ïoh ban ïakren bad ka hynmen jong ka Kong Nieñsidalin Riahtam, ka la ïathuh hadien ba ki la ïoh ïa ka kaiphot la pyni ba ki don dak mong ha ka met.
Ka la ïathuh ba ka jingslem ka kaiphot ka dei namar ki dang ap lang sa ïa kawei ka kaiphot namar kawei ka kaiphot kam da shai bha.
Haba ïoh ban ïakren bad ka Meiieid jong ka heprit, ka la pyntip ba mar shu ïoh ïa ka kaiphot la pyni ba ka khun ka don dak mong ha ka durkhmat.
Ka la ïathuh ba ka jingslem ka kaiphot ka dei namar ki dang ap lang sa ïa kawei ka kaiphot namar kawei ka kaiphot kam da shai bha.
“Ngin ïaid beit shakhmat ban buddien ïa kane ka jingshah pynïap ka para hadien ba ngi lap ba ki don dak mong ha ka met khnang ba ngin lap ïa ka jingshisha,” la ong ki bahaïing jong kitei baroh ar ngut bad ha kajuh ka por ki la kyntu ïa ki nongkitkam shnong bad ki pulit ba kin sngew synei lem ban shimkhia ban lap ïa kiba pynïap ïa kitei ki ar ngut.
“Haduh mynta ki pulit kim pat wan ha ïing ban tohkit hynrei ngi leit tang ma ngi sha ki pulit,” ka la ong.
Ka suba jur ba don beit ki briew kiba pynïap ïa ka khun namar kumno ka khyllung ba dang rit yn don ki dak mong ha ka met. Nalor nangta, ka la ïathuh hadien ba la ïaid shi bnai tam haduh mynta ki pulit kim pat wan ha ïing ban tohkit hynrei ki leit tang ma ki sha ki pulit.
