Shillong, Risaw 29
Ka tnat Kam Jngohkai jong ka Jylla ha ka Sngi Ba-ar ka la bishar halor ka jingpyntrei ïa ki projek bapher-bapher kiba kot palat T.400 klur na ka bynta ban kyntiew ïa ki kam jngohkai hapoh ka Jylla.
Haba kren sha ki lad pathai khubor hadien ka jingïalang, u Myntri ba khmih ïa ka kam Jngohkai, u Bah Paul Lyngdoh u la ong, hadien ba ïa ka Shillong la ithuh kum ka jaka ba ki nongshangkai pyrthei ki jied ban wan ha u snem 2025, ka tnat ka la pynkhreh ban pyntreikam ïa ki projek ban kot palat T.400 klur.
U la ïathuh ba ki don katto-katne ki projek kiba la bei pisa da ka Asian Development Bank (ADB) kaba kot haduh T.191 klur bad kumjuh ruh na ka mang tyngka jong ka Jylla ïa kaba la mang T.227 klur na ka bynta ki jingtei bapher-bapher ha kylleng ki jaka jong ka Jylla Meghalaya.
Na ka liang u Myntri u la pynbna ruh ba ka tnat ka la rai ban pyntreikam ïa ka ‘Tourism buddy scheme’, ka ban pynsuk ïa ki nongwan shangkai haba ki leit kai sha kylleng ki jaka jong ka Jylla.
Katkum ka jingong u Bah Paul, ka ‘Tourism buddy scheme’ ka dei ban buh ïa ki samla ki ban trei kum ki nongpahara, ki nongïalam lynti bad ki nongïarap ïa kiba wan jngohkai ha kiba bun ki liang, khnang ba kan pynsuk ïa ki nongwankai haba ki leit sha kino-kino ki jaka ha ka Jylla.
“Ngin sdang shwa kumba 70 ngut ki samla ha ka dur jong ka NIT (notice inviting tender), ka ban sa pynmih shen da ka Directorate of Tourism. Ngin sa pynmih ïa ka NIT ha kine ki ar-lai sngi ban wan namar ngi kwah ban pynlong kam hapoh ka pdeng taïew jong u Naiwieng, kaba sdang jong ka samoi shangkai,” la ong u Myntri.
Ha kaba ïadei bad ka jingphah jingthoh ka Meghalaya Tourism Development Forum (MTDF), ban wanrah noh ïa ka High Speed Luxury Rail Network, na ka bynta ban pynsuk ïa ki nongwan jngohkai bad ban pynduna ïa ka por leit por wan na Guwahati sha Shillong, u Bah Paul u la ong ba u khlem ïohpdiang jingthoh ei-ei na ka MTDF ba kin pynpaw ïa ka jingkwah ban wanrah ïa ka High Speed Luxury Rail Network.
“Ka lynti rel kaba dei ka mat ba jyrwit-jyrwat la bun bun snem kam don jingïadei ei-ei bad ka kam jngohkai, kane ka dei kaba hap hapoh ka jingkhmih jong ka tnat Transport,” u la ong, bad bynrap shuh-shuh ba ïa kano-kano ka rai ban shim halor kane ka mat ka dei kaba lah ban shim tang da ka Kynhun Myntri.
