Shillong, Risaw 29
Ka jingshah prong tuh jong ki ïing ki sem bad ka jingshah tuh jong ki ar shaka ki dang bteng beit jan man la ka sngi na kawei ka jaka sha kawei pat. Dang ha kine ki sngi ruh ka la don biang ka jingshah prong tuh jong ki ïing bad ka jingshah tuh jong ki ar shaka.
Katkum ka khubor kaba la ïoh na ki pulit la ong ba uwei u nongshong shnong ba sah ha kawei na ki dong ha nongbah Shillong u la ujor ba ha ka 26 tarik mynta u bnai, ha ka por kumba 8.30 mynmiet, ki runar bym lah ban ithuh ki la ïoh ban prong tuh shapoh ka ïing jong u bad ban tuh ïa ka pisa kaba la kot haduh T.8.3 lak.
Shuh shuh la ong ba na ka liang jong une u nongujor, kham hadien u la ïoh jingtip ba la ïohi ïa u kynum jong u, uba dang 19 snem ka rta, uba la rung shapoh ka ïing jong u, ha ka por bym shym la don briew satia.
Ha kawei pat ka khubor, la ong ba u Ajit Kumar Sharma u la ujor sha ki pulit ba ha ka 26 tarik mynta u bnai ha ka por 6.30 janmiet, ki runar bym lah ban ithuh ki la prong jubor shapoh ka ïing jong u kaba don ha Lumshatsngi Laban, Shillong bad ki la ïoh tuh ïa ka mobile phone ka jong u.
Ha kaba ïadei pat bad ki khubor shah tuh ar shaka, ka Mary Ana Sangma ka la ujor ba ha ka miet jong ka 26 bad 27 tarik mynta u bnai, ki runar bym lah ban ithuh ki la tuh ïa ka ar shaka jong ka kaba don ïa u registration number ML10-B-4608 na ka jaka sah ka jong ka, kaba don ha phyllaw jong ka 1st MLP Bn., Mawïong, Shillong.
Kumjuh ruh na ka liang jong u Bah Bakitdor Nongrum u la ujor sha ki pulit ba ha ka miet jong ka 26 bad 27 tarik mynta u bnai, ki runar bym lah ban ithuh ki la tuh ïa ka ar shaka jong u kaba don ïa u registration number ML05-Y-0064 na ka phyllaw jaka sah ka jong u, kaba don ha Madanrting Block-C, Shillong.
U Bah Erickstar Kurbah u la ujor ba ha ka janmiet jong ka 27 tarik mynta u bnai, ki runar bym lah ban ithuh ki la tuh ïa ka ar shaka ka jong u kaba don ïa u registration number ML05-R-9373 na ka jaka pynïeng kali kaba don ha Polo, Shillong.
