Nongstoiñ, Risaw 29
Ka jingshlur bad ki sap ki phong ha ryngkat ki riam kiba itynnad lyngba ki prokram bapher-bapher ïa kaba ki khynnah skul ka Anderson Higher Secon-dary School ki la ïoh ban pynpaw bad ïa shimbynta, ka la long shisha kaba pynshoh biej ïa ki kmie ki kpa kiba phah ïa la ki khun ha katei ka skul ha ka sngi rakhe ïa ka sngi ki kmie ki kpa lane ka ‘Parents Day 2024’.
Ha katei ka sngi, la sdang ïa ka jingrakhe lyngba ka jingïoh ïa ka jingkren pdiang na ka Kong WA Sohklet, Principal ka skul, la ïoh ïa ka jingpule ïa ka ktien ka jong U Blei na ki khynnah skul bad la ïoh ruh ïa ka jingduwai na u TBn AS Dohling na ka Balang Presbyterian New Nongstoiñ.
Shuh shuh la ïoh ban pynshit pynshngaiñ ïa katei ka sngi, da ki heprit naduh kiba dang pule Nursery, LKG, UKG, Klas I bad kiwei kiwei kiba la ïashim bynta shitrhem kum ka dak ban pynpaw ïa ka jingburom ïa la ki kmie ki kpa.
Ha katei ka sngi, u Bah Gabriel Wahlang, MLA ka Nongstoiñ u la long u kongsan ha ka jingdonlang u Bah H.K Thabah, ADC ka West Khasi Hills kum u symbud kongsan, u Syiem ka Hima Nongstoiñ u Pa’iem E.P Syiem, kiba la ïashim bynta ruh ban pyllait paidbah ïa ka magazine jong ka skul, bad la ïoh ruh ban aiti ïa ki mementos sha ki kongsan da ka President Managing Committee Anderson Higher Secondary School ka Kong SM Rapthap.
Ha kane ka sngi la ïoh ruh ban plie paidbah ïa u maw sah kynmaw ïa u nongseng ïa ka skul da u Pa’iem E.P Syiem bad la ïoh ruh ban plie ïa ka jingpyni-nam da u Bah H.K Thabah, ADC ha ka jingdonlang u kongsan.
U Bah Gabriel Wahlang haba ai jingkren ha kane ka sngi u la ong, ka jingnang jingstad ka long kaba donkam haduh katta-katta. Ka dei tang kane kaba lah ban pynkiew kyrdan ïa ka jingim jong man la uwei-pa-uwei bad kaba lah ban kyntiew sha u kliar u lum sha ka thong.
“Kane ka parents’ day ka long thik kum ka jingpynkynmaw ïa ngi ïa ka jinglong i mei, kmie ki kpa jong ngi, kim dei kiba nang ba la stad hynrei ki la aiti met bad mynsiem kumno ba ngan ïoh leit skul, kumno ba ngan kiew ha ka jingim, kajuh ïa ki khynnah skul, ki kmie ki kpa ki la aiti lut ïa phi nadong-shadong ba phin lah ban kiew ha ka jingim ka jong phi, ki dei ki hero kiba ha ka im ka ïap ki don bad phi, nga kwah ba to ngin ïa kynmaw ba kane ka dei kaba ki kmie ki kpa ki la aiti namar jong phi,” ong u Bah Gabriel.
