Shillong, Risaw 29
Ki samla pule kiba kwah ban leit pule doktor ha ka jaka pule doktor jong ka University of Sciences and Techno-logy of Meghalaya (USTM) ki la ïoh por tang khyndiat kynta ban thep kyrteng na ka bynta ban shahjied ban ïoh pule ha kane ka jaka pule kaba la ïoh jingmynjur na ka National Medical Council (NMC) ban sdang noh ïa ka jingai jinghikai.
Kane ka jingbuh por kaba tang khyndiat kynta ka la long ka jingduhlad ïa bun ngut ki samla pule khamtam kito kiba khlem ïoh jingtip eiei shaphang ka jingpynbna kaba la pynmih da ka tnat ka koit ka khiah ban ailad ïa kito kiba kwah ban thep kyrteng na ka bynta ban ïoh leit pule doktor ha USTM kaba la tip kum ka PA Sangma International Medical College ha Baridua, Ri-Bhoi district.
Ïa ka jingpynbna la pynmih ha ka Lah Sngi U Blei ka 28 tarik Risaw, 2024 bad ka por ban thep kyrteng ka la kut noh tang ha ka 29 tarik Risaw, 2024 hapoh 5 baje janmiet kaba la kut noh tang hapdeng khyndiat kynta.
Haba ïakren bad ka Myntri ka tnat ka koit ka khiah, ka Kong Ampareen Lyngdoh halor kane ka jingleh kyrkieh ban khot ïa ki samla ban thep kyrteng ‘online’ kaba long tang hapdeng shisngi, ka la pynshai ba ka USTM ka la ïoh jingbit kham slem na ka NMC ban sdang ïa ka PA Sangma International Medical College bad kane ka jingai por ka dei beit katkum ka jingbuh por jong ka NMC khnang ban ïoh sdang noh ïa ka jingai jinghikai mynta u snem.
Ki la don kumba 200 ngut kiba la thep kyrteng na ka bynta ban shahjied ban leit pule doktor ha USTM bad ka jingjied kan long katkum ka jinglah jong ki samla ha ka NEET da kaba bud ruh ïa ka reservation policy ka Jylla.
Ka Jylla Meghalaya ka ïoh bhah 64 ngut ban phah pule doktor ha ka jaka pule doktor ka USTM ha kaba ka jingmang pisa ban leit pule ka long T.4,95,000 marwei shisnem, bad haduh ban da pyndep ïa ka jingpule kan long T.24,75,000.
Haba kylli shaphang ka jingsiew ban leit pule doktor ha USTM, ka Kong Ampareen ka la ong ba na ki 64 ngut, kumba 40 ngut ki samla pule ka jylla kin ïoh jingkyrshan ha kaba 20 ngut yn bei lut ïa ka jinglut-jingsep, katba 20 ngut kin hap siew shiteng dor.
Ki samla pule kumba ju long kin ïoh ruh ïa ka baibam lane scholarship kaba ju ai ïa ki samla pule.
Ka la ong ba ka USTM ka hap ban sdang noh ïa ka jingai jinghikai katkum ki kyndon ka NMC bad kane ka jaka pule kan hap ruh ha ka jingpeit jingkhmih ka Sorkar Jylla katkum ki kyndon aiñ.
Shuh shuh ka la ong ba ka Ordinance kaba la dep ban ai jingmynjur da ka Kynhun Myntri ka Jylla mynta ka dang don bad u Lat na ka bynta ba un shon ïa ka muhor kum ka jingmynjur.
