Nongstoiñ, Risaw 30
Ki lai tylli ki shnat jong ka Khasi Students’ Union (KSU), ka Maweit Area Unit, Nongtraw Area Unit bad Porkhadoh Area Unit ha ka Sngi Balang ki la leit ban ïakynduh ïa u doktor ba peit ïa ka Maweit PHC halor ka jingud jingnam jong ki paidbah.
Ki Nongïalam ka KSU na kitei ki shnat, katkum ka kyrwoh khubor ba la phah, ki la pynpaw ba ka jingleit ïakynduh ïa u doktor ka long halor ki jingud jingnam jong ki paidbah, ki nongtrei bad ki nongpang ïa kaba la kam ba u leh heh, kren heh, kren tohmet ïa ki nongpang kumjuh ruh ïa ki nongtrei ba trei ha kane ka PHC.
Na ka liang jong ka KSU ka la maham ïa une u doktor ba u dei ban burom bad kren bha bad ban trei bha khlem kano-kano ka jingibeiñ ne kren tohmet ïa ki nongpang ne ki nongtrei hapoh ka PHC.
Shuh shuh la maham ruh ba lada ka KSU kan dang lap ïa ka jingleh heh leh donbor bad jingleh khlemakor khlem kheiñ kor ïa u duk u suk ka dong ka thaiñ, ka seng kan sa shim pat da kawei ka sienjam.
