Shillong, Risaw 30
U MP ka Lok Sabha na Shillong, Dr. Ricky AJ Syngkon ha ryngkat bad u MLA ka Mawlai Konsti-twensi, Bah Brightstarwell Marbaniang ki la hiar leit jurip ïa ka surok PMGSY na Lumawsiang shaduh Mawsiatkhnam ha ka 30 tarik Risaw 2024.
Ka jinghiar synranlang u MP ka Lok Sabha ïa u Bah Brighstarwell ka long u kwah ban tip ïa ka jingpyntrei ïa ka surok PMGSY na Mawtawar sha Mawsiatkhnam namar ka dei ka skhim ba la mang pisa na ka Sorkar India.
Ha kane ka jingjurip la synranlang da ki engineer ka tnat PWD Road naduh u Chief Engineer PMGSY bad ki Junior Engineer.
Haba ïakren bad u Bah Brightstarwell u la ïathuh ba ka jinghiar jurip ka long ban peit haduh katno ka la ïaid ka jingshna ïa kane ka surok kaba la mang pisa na ka skhim PMGSY kaba dei jong ka Sorkar India.
U la ïathuh ba ka jingtrei ka la ïaid kumba 70 persen ïa kane ka surok namar ki mawria ki la dep pynhap satang ban siang rong noh bad ki kynroh, ki muri la dep shna.
U la ong ba ki don ki bynta ba ka jingtrei kam pat da sngewhun hynrei la ai jingmut ba kin leh janai khnang ba ynda la dep kan long ka jingmyntoi ïa ki paidbah.
Ha kajuh ka por u la kyrpad ïa ki engineer ka tnat PWD Road ba kin nym shah ïa ki trok ban kit palat 9 ton ynda la dep shna ïa ka surok namar kan sa sniew kloi. U MLA u la lap ba ka surok na jingkieng Mawlai By Pass shaduh Shillong Airport Umroi ka dang ïaid tang 39 persen.
U la ïathuh ba ïa ka surok na Mawlai by pass la shna ban poi sha Umsaw, Umtrew, sha Umjathang ban poi sha kad liengsuiñ Umroi ha ka jingjngai ba 14 kilometer ha ka jingmang pisa kaba 34 klur tyngka tam. U la ïathuh ba ïa kane ka surok la sdang ban trei naduh 6 tarik Jymmang 2023.
