Shillong, Nailur 23
Ka United Democratic Party (UDP) ka la pyntip ba ka la sospon ïa ki lai ngut ki MLA halor ki kam ba ki la leh pyrshah ïa ka Party.
Haba kren sha ki nongthoh khubor u President ka UDP u Bah Metbah Lyngdoh u la ïathuh kum ka Party ka la dep ban phah shithi (Show Cause Notice) ïa ki lai ngut ki MLA ba ki dei ban ai jingpynshai ïa ka Party haba ïadei ki kam ba ki la leh pyrshah ïa ka Party.
“Na ka liang jong ka Party ngi la ai shithi pan jingpynshai sha ki lai ngut ki dkhot jong ka UDP, ar ngut kiba la pynlong jingïalang ha ki Constituency jong ki bad uwei uba la kren ha ka 11 tarik ha phyllaw ka ophis treikam hadien jong ka jingïalang CEC” la ong u Bah Metbah.
Shuh-shuh u la ïathuh ba hadien ba ka Party ka la dep ban phah ki shithi pan jingpynshai ïa kitei ki lai ngut, ka la ai por ruh ba kin wan ban pynshai hakhmat jong ka State Parliamentary Board kaba long katkum ka riti pynïaid kam jong ka Party ba kin pynshai ïa ki kam kiba ki la leh.
“Ngi la ai por ïa ki ruh ba kin wan pynsngew dalade lane da ka jingthoh shuwa ka por 12 baje jong ka 23 tarik u Nailur 2026, hynrei haduh ka por ba ka Party ka la shong ïa ka State Parliamentary Board, ym shym don napdeng kine ki lai ngut ban ai da ka jingthoh ne ban wanmih dalade ha ka jingïalang ban pynsngew ïa ki jinglap jingshem jong ka Party” la ong u Bah Metbah.
Kumta u la ong ba da kawei ka sur ka State Parliamentary Board ka la shim ïa ka rai ban buh noh ïa ki ha ka jingshah sospon haduh ba ka Party kan sa pynmih da kiwei pat ka jingpynbna.
Kitei ki lai ngut ki MLA ba ka UDP ka la rai ban sospon ki kynthup ïa u Bah Kyrmen Shylla MLA jong ka Khliehriat, u Bah Ollan Sing Suiñ MLA jong ka Mawsynram bad u Bah Mathew Beyondstar Kurbah MLA jong ka Mawphlang Constituency kiba la leit ban pynïasoh sha ka Bharatiya Janata Party (BJP) ha ryngkat ki paralok MLA ha nongbah Delhi.
Haba ki nongthoh khubor ki la buh jingkylli ïa u Bah Metbah ïa kiwei ki MLA kiba la pynïasoh sha ka BJP, u la kyntait ban kren eiei hynrei u la ong ba ïa kaei ka sienjam ba ka Party kan sa shim nangne shakhmat yn sa pyntip ha ki sngi ban dang wan.
