Shillong, Nailur 23
U Myntri Rangbah ka Jylla, u Conrad K. Sangma ha ka Sngi Balang u la ong ba ka Sorkar ka dang trei ban pynbeit ïa ka jing-ïa-ka-jia pud kaba la slem bad ka Assam, hynrei u la ban jur ba ïa ka mat kaba la sahteng mynta la 54 tylli ki snem naduh ba ïoh Jylla lajong, ym lah ban pynbeit shi-miet shi-miet.
Kane ka jingkren jong u ka long hadien ka jingïakynad kaba la mih ha khappud hapdeng ki 2 Jylla hadien jong ka jingjia ha Maikhuli.
“Kiba kum kine ki jingjïa ki la jia ha kine ki 54 snem ba la dep naduh ba la ïoh Jylla lajong. Kam dei kaei-kaei kaba la jia mynnin ka sngi ne myn shisngi,” la ong u Conrad sha ki nongthoh khubor.
U la ong ba kum kine ki jingjia ki ju jia shisien lano namar ka jingïakynad, ki jaka ba don hapdeng ka jing-ïa-ka-jia bad ka jingbym ïasngewthuh jingmut ha ki jaka khappud.
“Namarkata, ka dei ka sienjam jong ngi ban ïakren bad ïatreilang beit na ka por sha ka por bad ki paralok na sha shiliang ha ki kyrdan bapher-bapher ban pyntikna ba ngin ailad ïa ka jinglong-jingman ban long kaba jai-jai,” ong u Myntri Rangbah.
U Conrad u la ong ba katba ka jingpynjai-jai ïa ka jinglong-jingman ha ka kyrdan jong ki shnong ki thaw ka dei ka kam kaba kongsan eh ban pyntikna ïa ka jingsuk, hynrei ka lad ka ban neh shi syndon ka shong hi ha kaba pynbeit ïa ka jingïakynad.
“Hadien-habud, ka lad kaba paka tam ka long ban wad shisha ïa ka lad jingpynbeit kaba neh shi syndon haba ïadei bad kane. Hynrei kata pat kam dei kaei-kaei kaba lah ban jia da kaba suk namarba ka la long ka mat kaba la don mynta la 54 snem,” u la pynpaw.
U la bynrap ba ka Sorkar ka la nang ïaid shakhmat ha ki katto-katne ki jaka bad kan ïai bteng ïa ki jingpyrshang na ka bynta ki jaka kiba dang sah.
“Kumba phi tip, ha ki katto-katne ki jaka, ngi la lah ban ïaid shakhmat bad katto-katne ki sienjam bad wad ïa ka lad jingpynbeit. Ngin ïai bteng ban trei ha ka ban wad ïa ki lad jingpynbeit na ka bynta kiwei ruh, hynrei ka dei ka sobjek kaba eh, bad dei na kata ka daw ba kiba bun ki Sorkar kim shym la lah ban pynbeit ïa kane ha kine ki 54 snem ba la dep,” ong u Conrad.
