Shillong, Nailur 23
U Myntri Rangbah ka Jylla, u Conrad K. Sangma ha ka Sngi Balang u la ong ba ka jingpynïasoh BJP jong ki 8 ngut ki nongthaw aiñ ka UDP kan ym don kano-kano ka jingktah ïa ka Sorkar MDA ba la ïalam da ka NPP, bad pynskhem ba ka BJP kam shym la dawa shuki shuh ha ka Kynhun Myntri jong u.
Haba kren sha ki nongthoh khubor hadien ka jingpynïasoh BJP ki 8 ngut ki MLA ka UDP ha New Delhi (kaba la pynkiew ïa ka jingkheiñ jong ka BJP sha ka 10 ngut ki nongmihkhmat ha ka Ïingdorbar kaba 60 ngut), u Conrad u la ong ba kane ka kam ka dei hapdeng ki ar tylli ki seng saiñ pyrthei.
“Ka dei ka rai hapdeng ki ar tylli ki seng saiñ pyrthei, ka dei ka rai jong ki MLA iwei-pa-iwei. Kam don jingïadei eiei ruh bad ka NPP. Namarkata, ka dei shisha ka jingkwah bad ka rai jong ki MLA, kumta ngam don jingkynthoh eiei,” u la ong.
U la pynskhem ba ka jingkhlaiñ jong ka MDA baroh kawei ka dang sah hi kumjuh naba ki MLA ki la kylla liang hapoh ka Kynhun Synrop kaba synshar.
“Ka jingkhlaiñ jong ka Kynhun Synrop ka dang neh kumjuh namarba ka don hapoh jong ka kynhun synrop hi, kumta kam pynthut ïa ka jingtreikam jong ka Sorkar jong ngi. Wat lada ka long kumta ruh, ngi don ïa ka jingbun paid hapoh ka Ïingdorbar bad ngi sngewskhem bha ba baroh kiei-kiei kin long beit kumba ju long,” la ong u Conrad.
Hynrei u Myntri Rangbah u la kubur ba ka lah ban don ka jingsngewkhia hapdeng ka UDP bad ka BJP.
“Kin don katto-katne ki jingsngewkhia hapdeng ki ar tylli ki seng saiñ pyrthei namarba ki MLA na kawei ka seng ki la mih ban leit noh sha kawei pat. Kumta, kin hap ban ïa pynbeit ïa kata. Balei ki leit bad kaei ka jingthmu, kata ka dei kaei-kaei kaba ngam lah ban kren eiei,” u la bynrap.
Halor ka jinglah ban don ka jingbujli shuki Myntri, u Conrad u la kren shai: “Nga la dep kren shai bha, kane kan ym ktah eiei.”
Haba kylli la ka BJP ka la pan shuh ïa ki shuki Myntri, u la jubab, “Em, kim shym la pan eiei.”
La hato ka jingnang kiew jong ka BJP ka buh jingma ïa ka jinglong nongïalam jong u, u Conrad u la ong, “Em, kam don jingma kumba ka long mynta. Man la ka seng saiñ pyrthei ka don ka jingkwah ban kiew. Ha ka synshar paidbah, man la ka seng kan angnud – ngi angnud ban kiew ha ki Jylla bapher-bapher. Ngi la trei ha Manipur bad kiwei-kiwei ki Jylla. Ka ju long beit kumne.”
“Ngi hap ban trei ban pyntikna ba ka nongrim jong ngi ka long kaba khlaiñ bad ban leh la ka jong ka bynta ban pynbun ïa ki ‘seat’ kiba ngi don. Nga la ju kren shai bha ba ngi ju ïakhun ha la ki jong ki kyndon, kum ka jinglong kyrpang jong ngi hi bad kata kan ïai bteng ha ki por ban wan,” u la bynrap.
