Shillong, Nailur 23
Ka jingkyntiap seng jong ki 8 ngut ki MLA ka UDP sha ka BJP kala wanrah ruh ïa ka jingkylla ha ka jylli saiñpyrthei hapoh ka Khasi Hills Autonomous District Council (KHADC), kaba la sakhi biang ïa ka jingwan phai ka BJP hadien phra snem.
Napdeng ki 8 ngut ki MLA kiba la pynïasoh ïalade sha ka BJP ha Delhi ha ka sngi Balang, arngut na kine, kata u Bah Synshar Kupar Roy Lyngdoh Thabah (Nongspung-Sohiong) bad Bah Pius Marwein (Langrin) ki dei ruh ki MDC ka KHADC.
U Bah Synshar u la jop ïa ka ilekshon MDC ha u 2025 da 281 vote, katba u Bah Pius u la jop da kaba tam haduh 2899 vote.
Da kane ka jingleit ïasoh BJP, ka jingdon ki MDC ka UDP ha ka ïingdorbar ba 29 ngut ka KHADC, kala hiar sha ka 3 ngut kata tang u Nongïalam ka Liang Pyrshah Bah Titosstarwell Chyne (Sohra), Barikupar Synrem (Shella) bad Bah Equator Nongrang (Mairang-Nongkhlaw).
Ka khubor ka ïathuh ba u Bah Barikupar Synrem, para jong u MLA ka Shella Balajied Synrem uba ïasoh sha ka BJP, u lah ban bud lang noh sha ka BJP.
Ka KHADC ka dei kaba synshar mynta da ka Voice of the People Party (VPP).
Lah ban pynkynmaw ba ha u snem 2017, u Bah Neil Antonio War u dei u MDC ba nyngkong eh ka BJP ha KHADC ba mih khmat ïa ka Laitumkhrah Constituency.
