Shillong, Nailur 23
U Bah Lahkmen Rymbui uba dei u Myntri Sorkar ha ka sngi Balang u la ong, ka rai ki phra ngut ki MLA ka United Democratic Party (UDP) ban kynthih noh sha Bharatiya Janata Party (BJP) ka dei namar ki mat kiba kongsan bad kiba ktah ïa ka Jylla, kiba la kular shimkhia da ki Nongïalam ka BJP na Delhi.
“Ka jingrung sha ka BJP kam dei satia kaba shu wan jia syndet syndet hynrei kaba la urlong hadien ka jingïakren halor ki mat bapher-bapher kiba ktah ïa ka Jylla,” la ong u Bah Lahkmen.
Ïa kane la pynpaw da u Bah Lahkmen hadien ba la pynïasoh sha ka BJP ha Delhi ha ka sngi Balang bad ong ba ki mat kiba pynlong ïa ki MLA ban ïasoh BJP ki kynthup ïa ka jingpynrung ïa ka ktien Khasi ha ka Khyrnit ba Phra ka Riti Synshar, ka amendment jong ka MRSSA, ban pynjynsur ïa ka kam tih dewïong bad pynkynriah ïa ka Them Metor na Them Iew Mawlong.
U Bah Lahkmen u la ai khublei ïa u Myntri Rangbahduh Narendra Modi bad ong ba ka ri kala sakhi ïa ki jingkylla kiba khraw hapoh ka jingïalam jong u. “Mynta ka dei ka sngi kaba kongsan ïa ngi baroh, khamtam na ka bynta ki 8 ngut ki MLA kiba ïasoh sha ka BJP. Nga da sngewnguh shikatdei eh ïa u Myntri Rangbahduh ka ri. Hapoh ka jingïalam jong u, ngi la ïohi ïa ki jingkylla jong ka Ri,” ong u Bah Lahkmen. U Bah Lahkmen u la ong ba ka jingïakren ka la ïaid katto katne por bad dei hadien ba la ïoh ka jingkular shimkhia ïa ki mat kiba donkam ïa ka jingkyrshan na ka Sorkar Pdeng, ba la rai ban rung BJP.
U la pyntip ba ki nongïalam ka BJP kila ai ïa ka jubab kaba sngewtynnad halor kine ki jingsngewkhia ba pynsngew da ki MLA ka UDP.
“Baroh kine ki mat, bad kiwei ki mat ruh, ki nongïalam ka BJP kila ai ïa ka jubab ba sngewtynnad, kaba kin sa leh noh ha kine ki khyndiat por ban wan. Ta ka daw ngi la wan hangne ban ïasoh sha ka BJP,” ong u Bah Lahkmen.
