Shillong, Nailur 23
Ka kynhun ki nonghikai Deficit kaba la tip kum ka Khasi Jaiñtia Deficit School Teachers’ Association (KJDSTA) ka la pynbna paidbah ba kan pynlong jingïakhih da kaba ïaid rally ha ka 25 tarik u Nailur 2026.
Kane ka jingïaid rally ki nonghikai Deficit ka dei halor ka jingbym leh eiei ka Sorkar ïa ki mat jingdawa jong ki bad yn sdang ïa kane ka jingïaid rally naduh ka por 11 baje mynstep nakhmat ophis ka Meghalaya Board of School Education (MBOSE) ban pynkut ha madan Malki, Shillong.
Haba kren sha ki nongthoh khubor, u Babu Boswell S. Pala President ka KJDSTA u la ïathuh ba ka jingthmu jong kane ka jingïaid rally ka dei halor ka jingbymleh eiei ka Sorkar ïa kiba bun ki mat ba ka Association ka la ju dawa na ka por sha ka por.
U la ïathuh ba ka jingdawa ba hakhmat duh jong ki ka long halor ba ka Sorkar ka dei ban pyntreikam noh ïa ka CPF bad ka NPS ïa ki nongtrei Deficit, kumjuh ba ka Sorkar ka dei ban pynlait noh ïa ka DA ba 51% kaba dei jong u snem 2025, ban pyntreikam noh ïa ka CPF Contribution ba 10% na ka tulop jong ki, ban pynkloi ka jingthungkam ïa ki Deficit post ba dang thylli ha ki skul bapher-bapher.
Shuh-shuh u Babu Boswell u la ban jur ba ka Sorkar kam dei ban buh kano-kano ka jingsynjor ne ka jingma ïa ka Deficit System hapoh ka Jylla Meghalaya, da kaba pynpaw ba ka jingthmu jong ki nonghikai ka long ba kin pynleit jingmut ban ai jingnang jingstad ïa ki khynnah skul.
Kumta na ka liang u Babu Boswell u la khot la wer ïa baroh ki nonghikai Deficit ba ha ka Jylla ba kin shimkhia ban wan ïashimbynta ha kane ka rally kumba la pynbeit da ka Association.
Ha kajuh ka por u la kyntu ïa ki School Management Committee (SMC) ba kin ailad ïa ki nonghikai ba kin ïoh ban wan ïashimbynta ha katei ka jingïaid rally kaba dei ka jingeh ki nonghikai bad ka pule puthi ha ka Jylla baroh kawei.
