Khliehriat, Risaw 30
Ki pulit jong ka East Jaiñtia Hills District ki la ïoh tam ïa kawei ka metïap jong u rangbah briew ka bym lah satia ban ithuh ha ka jaka kaba la tip kum ka Sohjo, Dongkhliehchnong, Lumshnong.
Ïa kane ka metïap la lap ha ka 28 tarik u Risaw ha ka por kumba 9:20 mynstep.
Ka khubor pulit ka ong ba kane ka metïap kaba la thiah lyngktar ha surok ha Sohjo, Dong Khliehchnong kaba hap hapoh Lumshnong ka jngai kumba 200 mitar na ka surok bah NH-06.
U Superintendent of Police ka EJH u la pyntip ba ki pulit hadien ba ki la ïoh ïa ka jingtip ki la leit bran-bran sha katei ka jaka bad shem ba kane ka metïap kaba la pyut la suba ba ka dei jong u bar jylla bad uba la don kumba 40 snem rta.
Ïa ka jingtohkit kaba bniah ym shym la lah ban pyndep ha kane ka jaka namar ka metïap ka la pyut. Kumta hadien ba la leh ïa kaba donkam la pynkynriah noh ïa kane ka met sha ka jaka buh metïap jong ka Khliehriat Civil Hospital na ka bynta ban leh ïa ka Post Mortem.
Une briew u don ïa ka rynïeng 5.5 phut bad uba kham shai sniehdoh.
Kumta la kyntu ïa ki bahaïing-bahasem ne kino-kino kiba don jingtip ne ithuh ïa kane ka met kin phone sha une u nombor na ka bynta ban leh ïa kaba donkam Ph-8974703816
