Shillong, Naitung 17
U President ka Hynñiewtrep Youth’s Council West Khasi Hills District u Bah Lumlang Kharsyiemlieh u la kyntu ïa ka Sorkar Meghalaya ba ki shnong Khasi kiba don kumba 70 tylli eiei kiba hap ha Langpih sector ki dei ban hap beit ha Meghalaya.
U la ïathuh ba ha ka West Khasi Hills Regional Border Committee kaba rim ba la khlieh da u Bah Paul Lyngdoh ki nongïalam sengbhalang ruh ki long dkhot hynrei ha kane ka Committee ba thymmai um pat ïoh jingtip namar ka sorkar ka dang pynthymmai.
U la ïathuh ba ki shnong ba sah ki Nepali ki don kumba 1100 ngut kine baroh ki kwah ban hap ha Assam namar ka jingmyntoi ki la ïoh na Assam.
U la ïathuh ba ka Mawsikar kaba bun ki khasi kiba sah ki kwah ban hap ha Meghalaya watla ka Assam ka la wan buh Police Out Post.
U Bah Lumlang u la ïathuh ba haduh mynta ka committee kaba thymmai kim pat khot jingïalang.
“Baroh ki Khasi bad Garo kiba sah ha khappud ki kwah ban hap ha Meghalaya” u la ong.
U la ïathuh ba ka Assam pat ka wan kam haduh Mawsikar haba ka la buh Police Out Post tangba kiba sah ha kane ka shnong dei ki Khasi.
Kane ka jingïapynbeit ka la shim por namar ka wan ka ilekshon ha jylla Assam bad mar shu thaw biang ïa ka sorkar Thymmai ba la ïalam da u Himanta Biswa Sarma la ïoh ban pynthymmai biang ïa ki Regional Border Committee.
