Kyrpad ka AMAF ïa ka Sorkar Jylla ban khmih bniah ïa ka RVSF bad ATS

Shillong, Naitung 17

Ki nongïalam jong ka All Meghalaya Auctioneer Fraternity ha ka 17 tarik u Naitung 2026, ki la leit ban ai da ka jingthoh sha u Myntri Rangbah ka Jylla U Conrad Sangma bad ruh sha u Symbud Myntri Rangbah u Bah Sniawbhalang Dhar, ban weng shuwa ïa ka jingkhot tender online na ka bynta ki Registered Vehicle Scrapping Facility (RVSF) bad ki Automated Testing Station.

Haba kren bad ki nongthoh khubor, u President ka Meghalaya Auctioneer Fraternity u Bah R Diengdoh u la ong, ba ka seng ka pynpaw ïa ka jingsngewkhia haba ïadei bad ka tender ba khot da ka tnad transport ban sdang ïa ka Registered Vehicle Scrapping Facility bad Automated Testing Station.

U Bah R Diengdoh u la ong, ba na ka liang ka jong ki kim don ei-ei ban pyrshah ïa kane ka polisi jong ka Sorkar, hynrei ki don ka jingeh kaba namar na ka liang ka ophis jong u Commissioner jong ka tnad transport u la khot ïa ka tender ha ka 15 tarik Nohprah (December) 2025, ban ai ïa kane ka jaka ha Sumer, ban buh ïa ki kali ki bym pyndonkam shuh ne ba la scrap.

Ka kynhun ka la leit ban thep ïa ka tender sha ka tnad Transport bad ha kaba ki leit thep ki la pynpaw ba ki la pynjlan sha ka 28 tarik Kyllalyngkot 2026, bad hadien kata haba ki wan ban thep biang ka ophis ka la pynpaw ba la weng noh ïa ka tender. Ka kynhun kam don eiei ban pyrshah hynrei ki sngew lyngngoh ba ki la weng noh, hynrei syndet syndet ka mih ka khubor ba ki la khot biang ïa ka tender, ka seng ka sngewlyngngoh ïa kane bad pynpaw ba ki thrang ba ka tender kadei ban long beit Offline kumba leh mynshuwa.

U Bah R Diengdoh u la ong, ba ka jingkhot tender online kadei ban khanglad ïa ki trai Jylla, namar ka seng ka kwah ban ailad ïa ki Samla hynrei haba ki upload bad thep ki shem ba ki kyndon ki la pher. Kine ki kyndon jong kane ka tender ba mynta ki khanglad ïa ki trai jylla kiba trei ïa kane ka kam.

Ka Seng ka pynpaw ba ïa kane ka tender ka Sorkar ka dei ban ailad ïa ki trai Jylla ban trei ïa kane ka kam.

Na ka liang u Bah Larry C Nongkynrih General Secretary ka All Meghalaya Auctioneer Fraternity u la ong, ba kane kadei ka kam kaba ki la trei. U la ong ruh ba balei ka Sorkar kam khot ïa ki ban ïakren.

Ka Seng ka kyrpad ïa ka Sorkar ban pynsangeh noh ban khot tender online, hynrei ban leh beit da ka offline kumba ki ju leh mynshuwa.