Nongstoiñ, Naitung 17
Ka kynhun ki nongshet ja (Midday Meal) ïa ki khynnah skul ïa kaba la tip kum ka Union of Cook Cum Helper PM Poshan Meghalaya na ka tnad West Khasi Hills District ka la kyntu ïa u Myntri Rangbah ka Jylla, u Conrad K. Sangma ban shimkhia lem ban ai ka jingthoh sha ka Sorkar Pdeng ban pynkiew noh ïa ka bhah T.900 tyngka sha ka T.9000 ïa kaba mynta la ar phew snem kaba la neh.
Halor kane ka bynta, ha ka Sngi Thohdieng, na kaliang ka Union ka la ïoh ruh ban pynlong ïa ka jingïalang paidbah kum kawei na ki dorbar bah ki nongshet ja ha ka shnong Pyndengrei, Nongstoiñ, West Khasi Hills District ban ïakren halor kiba bun ki mat bad ki jingeh jong ki nongshet ja skul.
Ha kane ka sngi, hashuwa ban sdang ïa ka jingïalang, ka seng kum ka dak ban kynmaw burom ïa u Tirot Sing Syiem ka la pynlong ruh ïa ka jingsngap jar kaba shi minit.
Ka Kong Peaceful Marweiñ, President ka Union of Cook Cum Helper PM Poshan Meghalaya tnad West Khasi Hills District haba kren sha ki nongthoh khubor ka la ong ba kumba ka long mynta, ka bhah na ka Sorkar Pdeng ki ïoh T.900 bad na ka Jylla T.1100, bad kane ka T.900 na ka Sorkar Pdeng kaba dei kaba la neh mynta la arphew snem ha kaba ym shym la ïoh jingpynkiew eiei.
Ka la ong ruh ba ka Union ka buh ka jingdawa ba dei ban pynkiew noh ïa kane ka jingsiew namar ka long kaba rit bad la kyntu ruh ïa u Myntri Rangbahduh ka Ri ban pynkiew bad lada ym lah ban leh kumta, ka Union ka kwah ba kin pynduh noh syndon ïa kane ka PM Poshan Scheme ha kane ka Jylla namar ka shu kut tang ha ka jingkyrpad hynrei kam urlong satia, bad ka Union ka kyntu ruh ïa u Myntri Rangbah ka Jylla ba un ai ïa ka jingthoh sha ka Sorkar Pdeng halor kane ka bynta.
Ka Kong peaceful kala ïathuh ruh ba kane ka jingdawa kala iaid naduh u snem 2017 ter ter hynrei haduh mynta ka dang ïoh tang na ka Sorkar Jylla ha kaba na ka 100 ki la pynkiew sha ka khadwei spah, kumta ka jingsiew ka long ar hajar tyngka bad mynta ki kwah ba ka bhah na ka Sorkar Pdeng la kumno kumno ki dei ban pynkiew noh sha ka khyndai hajar katkum ka jingïaid jong ka por.
“Lada kane ka jingsiew ka long kaba rit, kam ïahap shuh bad ka kam kaba ngi trei, ngi hap ban trei man ka sngi ym tang shi sien ar sien shitaïew bad haba ngi la leit sha ka jingtrei ngim ïoh shuh ban leit bylla da kiwei kiwei pat ki kam, bad ine i ar hajar kumno keiñ ngin lah ban kyrshan bad pyndap ïa ki jingdonkam ha ïing ha sem jong ngi” ong ka Kong Peaceful.
Ka Kong Peaceful ka la ong ruh ba ki don ruh ki skul kiba phah hikai ïa ki nongshet bad kumba la tip kiba bun ki nongshet ki dei ki bym da nang da stad bad kim kot bor hi ruh haduh ban da long kum kita ki nonghikai, kumta halor kane, ka Union ka kyntu bad ha kajuh ka por ka maham ïa ki skul lada ki don kum kita, lada ka Union kan ïoh ïa ki sakhi kiba biang kan hap ban leh da kaba tyngeh.
Nangta, ka la ong ruh ba ki don ki skul ki bym pyndonkam hok ïa ka ‘Midday Meal Scheme’ bad halor kane, ka Union ka maham ïa kine ki skul ba ki dei ban pyndonkam hok, khnang ba kan long ka jingmyntoi na ka bynta ki khynnah kiba dei hok ban ïoh, ha kajuh ka por la kyntu ïa baroh ki nongshet ba ki dei ban shimkhia ïa la ka jong ka kam.
Sa kawei pat, na ka liang ka Kong Peaceful ka la ong ba ki don ki skul ba tang na ka bynta ka jingmyntoi ka jong ki, kito ki nongpynïaid skul ki kwah ba kin buh ïa ki nongshet da ki bahaïing hasem ki jong ki da kaba shu weng kam noh khlem kano-kano ka daw, bad halor kane ruh ba na ka liang ka Union ka sngew ban maham ba ki dei ban ïaid katkum ki kyndon.
Shuh shuh ka la ong sa kawei pat ka bynta kaba la ïoh ban ïakren ha katei ka jingïalang ka long halor ka jingsahkut ka ‘Honorarium’ ïa kaba haduh mynta naduh u bnai Ïaïong haduh Jylliew ym shym la pat ïoh ïa ka jingsiew, kumta ka Union ka kyrpad ïa ka Sorkar ban pyllait noh ïa ka jingsiew ka jong ki namar nalor i jingsiew iba rit haduh lai bnai ka dang pynsah kut, kane ka pynjynjar ïa ki.
Ka Kong Peaceful ka la ong ruh ba lada ka dang pynslem ban pyllait, ka Union hi kan hap ban shim da kiwei pat ki sienjam.
Ha katei ka sngi, la ïadonlang ruh u Bah Khroo L. Pariat, Adviser Sengkmie, Kong Gina Nengnong, President na ka Sengkmie bad la pynïaid ïa katei ka jingïalang da ka Kong Peaceful Marweiñ, President ka Union of Cook Cum Helper PM Poshan Meghalaya tnad jong ka West Khasi Hills District.
