Shillong, Naitung 17
Ka Raid Laban Sports Social & Cultural Organisation ka la shimbynta ha ka ban kynmaw burom ïa ka lyngkhuh sngi ïap ba 191 jong u Tirot Sing Syiem da kaba buh syntiew ha u Motdur jong u Syiem Tirot u ba don ha Warriors Memorial Garden, Kench’s Trace, Raid Laban Shillong.
“La sdang ïa kane ka jingïalang da ka jingduwai bad ka jingbuh syntiew ban ai burom ïa u nongïaleh laitluid jong ngi bad hadien kata la sam ïa ki jingbam jingdih tynrai sha baroh kiba don lang ha kane ka jingleh burom bud sa ka jingsam ïa ki jingbam sha ki khynnah kiba wan na ka longïing longsem ba duna ka ïoh ka kot, ki longkmie & longkpa ba napoh ka 19th South Shillong Constituency” ong ka kyrwoh khubor u Bah A Marweiñ u ba long kum u General Secretary ka RLSSCO.
Ha kane ka jingrakhe kynmaw burom ïa une u khlawait ka Jaidbynriew Hynñiewtrep la wan ban long kongsan u MLA ka South Shillong Constituency u Bah Sanbor Shullai ha ryngkat ka jingïashim bynta ki longkmie longkpa ki khun samla jong ka thaiñ.
