Jowai, Risaw 30
Bun ki briew ki lap khana tang ïa ki jingduna jong ka Sorkar ba ïalam da ka NPP hynrei kim ju lap khana pat ïa ki kam ba bha ba ka Sorkar ka la leh, ong u Symbud Myntri Rangbah ka Jylla u Bah Sniawbhalang Dhar haba kren ha ka sngi pynhap pyrda ïa ka jinglehkmen dap 50 snem ka Mukhla Raij Upper Primary School ha ka 30 tarik Risaw.
Haba bteng ïa ka jingkren, u Bah Sniawbhalang u la ong, “Ym don Sorkar kum kane ka Sorkar kaba mynta, tang hapoh 6 tylli ki snem ka la leh shibun ki kam pynroi ban kyntiew ïa ka jylla bad lada ïathuh shisngi ruh um dep shuh bad ïa kane phi la sakhi ym donkam shuh ban batai”.
Nalorkata, u la pyntip ruh ba ka Sorkar ka la dep ban mang 55 klur tyngka na ka bynta ka surok hapoh ka Jowai Konstitwensi bad u la pynbna ruh ban tei ïa ka Sports Complex ha ka shnong Mukhla ym kum ha Wahïajer hynrei hapoh ïa ka Wahïajer.
“Nga la wan jurip ïa ka jaka ban tei ïa ka Sports Complex na ka bynta ka Mukhla Raij bad hapoh 5 snem phin sa ïohi kaba kumno kata ka Complex, ïa mynta ngam pat ïathuh namar nga kwah ba u MLA (Wailadmiki Shylla) un jop bunsien kum u MLA,” la ong u Bah Sniawbhalang.
