Shillong, Risaw 30
Ka kaiphod jingtohkit ka la pyni ba kam don ka jingsam ïa ki tin sop ïing (CGI sheets) kaba pynkheiñ ïa ki kyndon pyrkhing ilekshon lane ‘Model Code of Conduct (MCC)’ kumba la kynnoh ka TMC ha ka jingujor dang shen.
Katkum ka kaiphod jingtohkit kaba 18 tarik u Risaw, 2024, la ong ba u Returning Officer u la phah tohkit hadien ba la ïohpdiang ïa ka jingujor na ka TMC lyngba u District Coordinator, u S.N Sangma dang shen ha kaba la kynnoh ba ka NPP ka la sam tin sop ïing sha ki nongshong shnong kiba hap ha Gambegre ban khring vote kaba long ka jingpynkheiñ ïa ki kyndon pyrkhing ilekshon (MCC).
La kynnoh ruh ba ka don ka jingsam tiar sam tar ha shnong Aminda Simsang (Polling Station No. 2) wat hapdeng ka jingtreikam ki kyndon pyrkhing ilekshon namar ka ilekshon MLA shiteng samoi ha Gambegre konstitwensi.
Hynrei ynda la tohkit la lap ba ka jingkynnoh kam don nongrim namar ym shym la don ka jingpynlang lypa ïa ki tin sop ïing kumba la kynnoh bad kam don ka jingsam tin.
Ka TMC ka la kynnoh ba ka NPP ka la pynlang lypa shibun ki tin sop ïing ban sam sha ki paidbah.
Ka kaiphod tohkit ka ong ba wat kawei ka briew kaba don ki tin sop ïing la lap ba ka la thied hi na Tura na ka bynta ban sop ïa ka sem masi kaba dang maramot.
