Shillong, Risaw 15
U Executive Member ka Khasi Hills Autonomous District Council uba peit ïa ka tnad Elaka u Bah Denzil Chen u la ïathuh ba don ki hima ki bym sngewhun ïa ka rai jong ka Executive Committee ki leit ai mukotduma sha ïingbishar bad don pat kiba shu wan pynpaw ka jingpyrshah hakhmat ka ophis ka KHADC.
Kane ka jingong u Bah Denzil ka dei haba jubab ïa ka jingïakren halor ka jingtreikam ka Executive Committee kaba dei shaphang ka tnad Elaka ba la wanrah da u nongïalam ka Liang Pyrshah u Bah Titos Chyne bad ïashimbynta da ki dkhot ka liang pyrshah naduh u Bah Pius Marwein, Bah Ricky Shullai, Bah Barikupar Synrem bad Bah Srali Rashir.
U Bah Denzil u la ong ba u dieng uba seisoh bun kiba kawang maw namar kiba bun kiba kynnoh ba kane ka Executive Committee kaba mynta ka dei kaba bun bha ki mukotduma.
U la ong biang ba ka jingbun ki mukotduma ha Meghalaya High Court kam mut ba ka EC ka bakla ban shim rai hynrei ka ïingbishar ruh ka pdiang ïa ki mukotduma namar ka kwah ban bishar ka kwah ban sngap ïa baroh arliang mamla.
Shuh shuh u la ïathuh ba ka jingbun ki mukotduma ha ïingbishar Meghalaya High Court kam mut ba ka EC ka bakla shim rai hynrei ki bym sngewhun ki leit sha ïingbishar bad ki bym leit sha ïingbishar ki shu wan pynpaw ka jingpyrshah hakhmat ka phyllaw ka KHADC.
U la ong ba ha ka synshar paidbah ka ri India ki paidbah ki bym sngewïahap ki don ka hok ban pynpaw ka jingpyrshah hynrei lada kheiñ ïa ka jingpyrshah jong ki kam dei pat baroh ki khun ki hajar ki don tang katto katne ngut.
Shuh shuh u la pynshai ba wat ïa ka rai jong ka ïingbishar Meghalaya High Court, ki dang don kiba leit ujor mukotduma biang sa sha ïingbishar bahakhlieh ka ri ka Supreme Court.
