Shillong, Risaw 15
Ka jingpynslem ban thung Director General of Police (DGP) ba man ka por ha Meghalaya ka la wanrah ïa ka jingkynthoh kaba jur na ka Voice of the People Party (VPP), kaba la dawa ïa ka jingpynshai na ka Sorkar Jylla.
Haba ïadei bad ka jingpyntip jong ka UPSC ha ka 24 tarik u Nailur 2026, u nongaiktien ka VPP, u Dr. A.W Rani u la ong, ba ka Commission ka la hap ban pynmih ïa ka Reminder-II sha ka Sorkar Jylla na ka bynta ban khot ïa ka Empanelment Committee Meeting (ECM) na ka bynta ban pynkhreh ïa ka panel ban thung ïa ka kam DGP.
“Ka VPP ka pynpaw ïa ka jingsngewkhia kaba jur halor ka jingbym lah jong ka Sorkar Meghalaya, ban aiti ïa ka jingtyrwa kaba donkam sha ka UPSC ban khot ïa ka ECM ban pynkhreh ïa ka panel, ban thung ïa ka kam DGP. Ka shithi ba la pynmih da ka UPSC ha ka 24 tarik u Nailur 2026, Reminder-II, kaba la ïathuh ba ka Commission ka la dep thoh sha ka Sorkar Jylla halor kajuh ka bynta, hynrei ka jingtyrwa ba donkam ka dang sahkut,” la ong u Dr. A.W Rani.
U la ong ba katei ka jingpynkynmaw ban bud ryntih ïa ki jingbthah jong ka Supreme Court, ka buh jingkylli kaba jur bha halor ka jingthmu jong ka Sorkar.
“Kane ka buh ïa ka jingkylli kaba kongsan, ba balei ka Sorkar kam shym la shim ïa ki sienjam kiba donkam wat hapdeng ka jingpyntip bunsien na ka UPSC. Hato kane kadei ka jingbym lah ban synshar, ka jingbym shimkhia ne ka don kawei pat ka daw? u la buh kylli.
U Dr. A.W Rani u la ban jur ba ka jingthung DGP ka ïadei bad ka jingmyntoi u paidbah, ka aiñ bad ka suk ka saiñ, da kaba ong, “Ka jingthung heh pulit ka Jylla, kadei ka mat kaba kongsan bha ha kaba ïadei bad ka jingïalam, ka jingkitkhlieh ha ki tnad treikam bad ka jingtreikam kaba paka jong ki bor ba dei khmih ha ka aiñ. Kum kane ka rukom treikam, yn nym shah ban sahkut khlem ka jingpynshai kaba pynhun, khamtam haba ka UPSC ka la kdew shai shaphang ka jingbud ryntih ïa ki jingbthah ka Supreme Court”.
Haba dawa ïa ka jingshai, ka VPP ka la ong, “Ki paidbah ka Meghalaya kidei hok ban ïoh ïa ka jingbatai kaba shai. Ngi dawa na ka Sorkar ban pynshai ïa ki daw jong kane ka jingpynslem, bad ban batai ïa kaei ka sienjam ba la leh, ban pynthikna ïa ka jingbud ryntih ïa ki kyndon aiñ bad ki kyndon treikam”.
