Nongstoiñ, Risaw 15
U Myntri Rangbah ka Jylla Conrad K Sangma ha ka sngi Palei u la ïoh ban plie paidbah ïa ka Maternal and Child Health (MCH) Hospital, Nongstoiñ hadien ka jingsahteng la bun snem, ha kaba kane ka jingplie lehse kan long ka jingkyrkhu ïa ki paidbah bad sah jingkynmaw ba ha ka jingrakhe dap 50 snem ka District.
Ha kane ka sngi plie ïa ka MCH Hospital la donlang ruh u Myntri Sorkar Bah Methodius Dkhar, Bah Gabriel Wahlang, MLA ka Nongstoiñ, u MLA ka Rambrai Jyrngam u RG Momin, ki heh ophisar Sorkar bad kiwei-kiwei kiba la shah khot sngewbha.
Ha kane kajuh ka sngi la plie ruh ïa u maw nongrim jong ka Golden Jubilee Garden, ïa u maw nongrim jong ka ïing thymmai ka DIET bad kumjuh ïa u mawnongrim jong ka surok Nongstoiñ-Sohpian bad la ïoh ruh ban aiti ïa ka Ambulance ba la ai sngewbha da ka IDBI Bank sha ka tnad ka Koit ka Khiah.
Lah ban kdew hangne ba ïa katei ka Maternity and Child Hospital kaba don ha Nongstoiñ la tei ha ka jinglut kaba T.31.05 klur. Kane ka hospital ka don ïa ka OPD bad ka Laboratory Complex, ka Emergency Unit, ka Labour Room, ka ICU, ka Neonatal Intensive Care Unit (NICU) bad ka Operation Theatre Complex. La buh ïa ka jaka pynmih oxygen jong ka PSA ha ka jinglut kaba T.37 lak.
U Myntri Rangbah haba kren kum u kongsan ha kane ka sngi u la ong, ka MCH jong ka Nongstoiñ ka dei ka jingkular kaba la leh ha ka por jong ka prokram CM Connect, ha kaba ki nongshong shnong kila pynpaw ïa ka jingsngewkhia halor ka jingsahteng kaba la neh slem bha.
U Myntri Rangbah u la ong ba ka CM Connect ka dei ka jingpyrshang jong u ban pynthikna ba ki mat ki jura naduh tynrai ba kin poi sha ki shkor jong u Myntri Rangbah ka Jylla bad nangta sha baroh ki tnad.
U la ong ruh ba ka jingroi jingpar baroh kawei kam lah ban long tang hapoh sor Shillong bad sor Tura, hynrei ki dei ban long kumjuh ha manla ki konstitwensi. Ka jingbei tyngka kaba heh tam ka dei T.383.91 klur ka jingpynheh ïa ka bynta jong ka surok Nongstoiñ-Maweit-Nongjri kaba jrong 35 km, kaba pynïasoh ïa ka Nongstoiñ sha Ranikor ha South West Khasi Hills.
Ym tang katta, u la ong ruh ba lada kheiñ lang baroh ki jingtheh pisa na ka bynta ki surok kiba ban pynïakynduh sha Nongstoiñ kila kot sha ka T.498.31 klur, kaba kynthup ïa ka surok Nongstoiñ-Nongjri T.383.91 klur, ka bynta Nongstoiñ-Maweit hapoh ka RIDF T.63.01 klur, surok Sohpian-Nongstoiñ T.22.27 klur (kaba dang shu buh maw nongrim mynta ka sngi) ka surok Nongkhlaw-Byrki-Umdohlun kaba don ar tylli ki jingkieng hapoh ka PMGSY-III T.29.12 klur.
U Myntri Rangbah u la bthah ruh ïa ka tnad PWD bad ïa ki kontraktor ban pyntikna ba ki jingtrei kin long kiba bha naduh ki lynti ïaid kjat bad ki nala um. U la bthah ïa ka DC bad u MLA ba kin buddien ïa ki kam bad ban ai jingtip beit sha u lada don kino-kino ki jingeh.
U la ong ruh ba katba ka West Khasi Hills ka dang rakhe ïa ka jingdap 50 snem, kumta ki khyndiat snem ban wan ki dei ban long ki snem kiba kongsan. U la kyntu ïa ki konstitwensi bad ka distrik ba ki dei ban don bad buh da ka thong na ka bynta 3 snem, 5 snem, 10 snem bad 50 snem.
Shuh shuh u Myntri Rangbah u la ong ba jan T.900 klur ki projek kiba la pyntrei tang ha West Khasi Hills ha kine ki 8 snem ba la dep ha kylleng ki bynta, kajuh sha South West Khasi Hills, South Garo Hills bad East Jaiñtia Hills. U la ai nuksa ïa ka T.450 klur ka surok Sutnga-Saipung la ai jingmynjur kaba ym pat ju shna naduh ba ïoh la ka Jylla.
