Shillong, Risaw 15
Ha ka janmiet jong ka sngi Palei, ka 15 tarik u Risaw 2026, u pipe um jong ka tnad Public Health Engineering (PHE) u la bthei kynsan na ki bynta ba bteng (Joint) ha ki bynta jong ka surok Polo, Shillong.
Ki artylli ki kali shimet, ki la julor katto-katne na ka daw ka jingkynshait kynsan ka um ba bthei na u pipe na katei ka surok.
Katkum ki khubor ba la ïoh lum la long ba kane ka jingbthei u pipe um, ka la jia ha ka por kumba 6:10 baje eiei janmiet, kane ka la pynlong ïa ka surok ban shlei da ka um kaba la wanrah katto-katne ka jingthud ha ka jingïaid ki kali ha surok, kaba la don ruh ka jingdheng kali ha ka surok Polo shaduh 4-furlong, na ïingsah u Myntri Rangbah bad kiwei ki surok kiba poi sha Polo.
Ki tyllong khubor ki la ïathuh ba u tei u pipe um, u don kaei re kaei kaba blok ha kaba ka tnad PHE baroh shi sngi ka la pynlong ka jingwad bniah ban lap ïa ka daw, hynrei kim shym la lap satia bad ïa ka um la pynsangeh da ki nongtrei mar ïa ïoh jingtip ba la bthei u pipe um ha Polo.
Lah ban kdew ba kane ka jingjia bthei u pipe um, ka la jia ruh ha ki khyndiat taïew ba la dep ha surok Golfinks ban poi sha Lumshyiap bad kane kaba mynta ka la dei ka sien kaba ar ka jingbthei pipe um ha Nongbah Shillong bad u tei u pipe ba bthei ha Polo mynta ka miet, u dei u ba pynpoi um sha ki thaiñ Mawpat.
