Shillong, Risaw 15
U Symbud Myntri Rangbah ba khmih ïa ka tnad Kam Pohïing Bah Prestone Tynsong ha ka sngi Palei u la kyntait ïa ka jingdawa ka VPP ba pan jingshai na ka Sorkar Jylla halor ka jingpynslem ban thung DGP ba pura, hadien ba ka UPSC kala phah ïa ka shithi pynkynmaw kaba ar.
“Ka jingpynslem aiu kata? Lano ba kane ka DGP bamynta kan shongthait?” buh jingkylli u Bah Prestone.
Lah ban kdew ba ka Director General of Police ba mynta Kong Idashisha Nongrang kan sa shongthait ha u bnai Naiwieng mynta u snem.
Halor ka jingkylli ba ka VPP kala kdew ba ka UPSC kala ai ïa ka shithi pynkynmaw kaba ar sha ka Sorkar Jylla, u Bah Prestone u la ong, “Kampher la ka dei ka UPSC ne ka Ministry of Home Affairs, ngi la bud ïa baroh ki kyndon ba dei ban bud. Lada ki kwah ban tip khambha shuh shuh, nga kwah ban kyrpad ïa ki ba kin wan bad ïakynduh markhmat bad nga”.
“Ai ba kin wan bad ïakynduh markhmat ïa nga. Kam ïahap ban shu kren sha ki lad pathai khubor halor kine ki kam ophis. Lada ki kwah, ym donkam satia ban da leit sha ki lad pathai khubor kumne, ai ba kin wan bad shong ha ka miej ïakren, ngan batai sha ki halor ka jingshisha,” ong u Bah Prestone.
