Mawkyrwat, Risaw 15
Ki khun ki hajar jong ka Hima Langrin ha ka 14 tarik u Risaw, 2026 ki la hiar jurip ïa ka karkhana shna coke (coke factory) ha kawei ka jaka kaba tip kum ka Porshangdiar hajan ka shnong Rajaju, Ranikor Civil Sub Division ha South West Khasi Hills District.
Ka jingjurip ki khun ki hajar ka Hima Langrin ryngkat ki dkhot ka Seng Samla Hima Langrin ïa kane ka coke factory ka dei namar ba ki kwah ban tip mano ba ai bor ban tei ïa ka bad mano ba dei trai ïa kane ka karkhana shna coke namar ki khun ki hajar ka hima ki khlem ïoh jingtip eiei.
Ki la pynpaw ruh ba ka jingtei ïa kane ka karkhana ka dei kaba beaiñ bad ki pyrshah jur ïa kane namar u Syiem u khlem pyntip ne khot ïa ka public hearing ne ïa ka Dorbar Pyllun ban pyntip ïa ki khun ki hajar la ki pdiang ne pyrshah da kaba bynrap ruh ba kane ka jaka ka don hapdeng ka mukotduma ka jingïaknieh longtrai ïa ka khyndew hapdeng u Syiem bad ka Hima.
Ki la pynrem jur bad kynnoh ruh ïa u Syiem Nongtei Syiemiong ba u dei ban hiar shuki noh namar ka jingleh donbor jong u ban ai ‘NOC’ bad aiwai ïa ka khyndew jong ka hima khlem da rai da ki khun ki hajar.
Ki la ïathuh ruh ba ha kaba ïadei bad kane ki la leit ban ujor ha u SDO Civil ka Ranikor Civil Sub-Division, ka tnad Forest, ka KHADC ha ki bnai ba ladep hynrei kaba sngewsih ka long ba ki khlem ai jubab eiei halor kane ka kam.
Ki la ong ruh ba ka jingtei ïa kane karkhana kan sa ktah bad pynjaboh ïa ka mei mariang kumjuh ruh ïa ka koit ka khiah bad lada ka don ka jingduh noh ki mynsiem briew mano ban shim ïa ka jingkitkhlieh?
Ha kane ka sngi ki khun ki hajar ki la khang noh shipor ïa kane ka karkhana bad dawa ruh na ki bor District ba ki dei ban pynsangeh noh mardor kat haduh ba u Syiem un pynshai ïa ki khun ki hajar.
Kiba ai jingkren ha kane ka sngi ki long u Blodingwell Lyngdoh, President Seng Samla Hima Langrin, Bah Andreas Lyngdoh bad Bah Faindess Syiemiong.
