Khliehriat, Risaw 30
Ka ïingbishar u Special Judge POCSO, East Jaiñtia Hills District, Khliehriat ka la rai pynrem ïa u runar uba kyrteng u Ruling Bamon da kaba set patok 9 snem 8 bnai bad 27 sngi namar ka jingdonkti ban leh be-ijot ïa kawei ka khynnah.
Ka ïingbishar ka la rai pynrem ïa une u runar hapoh ki kyndon jong ka POCSO Act da kaba daiñ kuna ruh T.30,000.
U Superintendent of Police ka East Jaiñtia Hills u la pyntip ba ïa ka mukotduma la register ha thanat Khliehriat katkum ka Case No. 164(09)2018 hapoh ka kyndon aiñ POCSO Act ha kaba la pynkhamti ïa ka jingtohkit ha ka Women Police Inspector O Tyngkan.
Ïa ka jingtohkit la pynlong ha ka rukom kaba bniah bad la chargesheet katkum ka Case No. 122/2019 dated 31-10-2019.
Kumta hadien ba la pyndep ïa ka jingshim bishar, ka ïingbishar u Special Judge POCSO ka la pynbna ïa katei ka rai pynrem pyrshah ïa utei u runar.
