Tura, Risaw 30
Haduh kumba 8 ngut ki khar Bangladesh ba kynthup ïa ki 3 ngut kiba dang rit ki la shah bat noh ha ki pulit jong ka West Garo Hills (WGH) na khappud Bangladesh hadien ka jingïoh jingtip halor ka jingdon ka jong ki ha ka thaiñ Dalugaon jong ka district.
Kane ka jingïoh bat ïa kitei ki 8 ngut ka la jia ha ka 28 tarik mynta u bnai, ha ka por ba kine ki khar Bangladesh ki la don ha lynti ban leit phai biang sha Bangladesh hadien ba ki la rung beaiñ sha India lyngba ka Murshidabad district jong ka West Bengal.
Katkum ki tyllong khubor, ha ka por kumba 9:30 mynmiet, ki pulit ka Dalu ki la ïoh jingtip ba ki la don katto katne ki khar Bangladesh ha ka surok PWD ha Dalugaon, ha kaba ki pulit ruh mar mar ki la hiar sha kane ka jaka bad ban wanrah biang ïa kitei ki briew sha thanat. La kem noh ïa ki hapoh ka Foreigners Act, 2005.
Kine ki khar Bangladesh kiba la shah kem ki dei kiba la tip kyrteng kum u Bilal Hussain (31 snem), Md Alongir Hussain (51 snem), Md Sahin Hussain (19 snem), Md Rimon (19 snem), Belli Bibi (30 snem) bad lai ngut ki khynnah kiba don ha ka rta kaba 17, 14 bad 8 snem. Kine kiba la shah kem ki dei ki nongshong shnong jong ka Chor Asaria kaba hap hapoh ka thanat Godavari ha Rajshahi district jong ka Bangladesh.
Ha ka jingtohkit, la ïoh jingtip ba kine ki briew ki la rung shapoh u pud u sam jong ka India ha ki bnai Jylliew bad Naitung, 2020, lyngba ka Lalgola Murshidabad (WB) bad ban leit sha shnong Dalugaon, da ka jingthmu ban leit phai biang sha Bangladesh, khlem ki kot ki sla kiba biang.
