Shillong, Risaw 31
Ka jingïalap ilekshon na ka bynta ka ilekshon MLA shiteng samoi ha Gambegre konstitwensi ka la sdang ban kham shongshit hadien baroh hynriew ngut kyrtong ki la pynskhem ban long ki kyrtong ha kaba ka jingthep ‘vote’ kan sa long ha ka 13 tarik Naiwieng.
Kumba ka long mynta, ka jinglong-jingman ha Gambegre ka long kaba jai-jai bad baroh ki jaka thep ‘vote’ ki dei ki bym don jingma.
Ha ka jingshisha, ha ka por ba pynbna ïa ka ilekshon shiteng samoi, ka Gambegre konstitwensi ka don kumba 31 tylli ki jaka thep ‘vote’ kiba don ha ka jingma.
Hynrei hadien ba la khmih bniah ïa ka jinglong- jingman, bad katba nang ïaid ki sngi ban pynkhreh ïa ka ilekshon, ka jinglong-jingman ka la nang kham biang namar ka don ka jingpeitngor hapoh ka konstitwensi baroh kawei.
“Ka jinglong-jingman ka dei kaba lah ban kylla bad katba nang ïaid ka jingïalap ilekshon bad nang jan ki sngi sha ka jingthep ‘vote’, hap ban lum jingtip bha halor ka jinglong-jingman ki jaka thep ‘vote’ bad ka konstitwensi baroh kawei,” la ong ka tyllong khubor.
Halor ka jingdonkam ïa ki bor pahara, ka tyllong khubor ka ïathuh ba ka tnat pulit bad ki bor district kin peit ïa ki jingdonkam kiba donkam ban leh.
Ka Gambegre ka don 51 tylli ki jaka thep ‘vote’ bad ki nongthep ‘vote’ ki don 32 hajar 254 ngut ha kaba 16 hajar 331 ngut ki nongthep ‘vote’ shynrang bad 15 hajar 923 ngut ki dei ki kynthei.
Ki don 993 ngut ki nongthep ‘vote’ kiba dang khie samla, 64 ngut kiba la noh ka rta sha ka jinglong tymmen, bad 100 ngut kiba don jingduna dkhot met.
Ki hynriew ngut kyrtong ki long ka kurim u Myntri Rangbah, ka Dr. Mehtab Chandee A Sangma kaba la thep kyrteng kum ka kyrtong ka National People’s Party (NPP), u Jingjang M Marak uba dei u kyrtong ka Indian National Congress (INC), ka Sadhiarani Sangma kaba dei ka kyrtong ka All India Trinamool Congress (AITC), nalor u Bernard N Marak kum u kyrtong ka Bharatiya Janata Party (BJP). Ki kyrtong shimet ki long u Sengkrabirth M Marak bad Jerry A Sangma.
