Shillong, Risaw 31
Ka Khasi Students’ Union (KSU) lyngba ka Employment Monitoring Cell ka la phah da ka dorkhas sha u Symbud Myntri Rangbah ka Jylla u Bah Prestone Tynsong, uba khmih ïa ka tnat Kam Pohïing halor ka jingbym beit ka rukom thung kam ha ka Directorate of Prosecution ba la pynlong da ka Meghalaya Public Service Commission (MPSC).
Ha ka kyrwoh khubor ba la pyllait da u Chairman ka Employment Monitoring Cell ka KSU u samla Reuben Najiar, u la ong ba ka seng bad ki paidbah hi kam sngewpher shuh ïa ka jinglong torti ka rukom thung kam thung jam lyngba ka MPSC bad kane kan dang ïai jia katba ym pat pynkylla ïa ka rukom treikam jong ka MPSC.
U la ong, ha kaba ïadei bad kane ka bynta, la khot aplikeshon na bynta 6 tylli ki post jong Assistant Public Prosecutor ha u snem 2023. Katkum ka jingpynbna (advertisement) uno-uno ne kano-kano ba kwah ban aplai na bynta kine ki post, ki hap ban don 3 snem ka jingshemphang (experience), kaba mut ki dei ban dei ki muktiar kiba la ïasaid ha ïingbishar ym duna ïa ka 3 snem bad ki dei ruh ban long kiba la pyndep ïa kino-kino ki criminal cases.
U samla Reuben u la ong, hynrei kaba sngew lyngngoh ka long ba uwei na kine kiba pass bad mih kyrteng um shym la lah ban pynbiang ïa kitei ki kyndon ba don ha ka advertisement. Ka Seng ka la lap ruh ba u dang shu pass ïa ka eksamin ha u snem 2023 bad lehse un ym pat lah ban pyndep ruh ïa ka eksamin All India Bar Examination (AIBE) kawei na ki eksamin ba ki nongïasaid (lawyer) ki hap ban pass hadien ba la ïoh ‘law degree’ ban lah ban ïoh laisen ban ïasaid kum u muktiar ha ïingbishar.
Ka jingshah jied jong une u samla ka pyni ba ka don eiei sha lyndet ba ka MPSC ka pynkheiñ hi ïa ka kyndon ba ka la buh. Haba kim pyntreikam ïa ki kyndon te ka myntoi aïu ban buh bad ha kajuh ka por ka jingdon jong kine ki kyndon ka pynlong ïa kiwei ba dang shu pass ban ym ïoh aplai.
Namar kata, ka KSU ka dawa ba ka tnat Kam Pohïing ka dei ban pynbeit ïa kine kynrum-kynram bad jied ïa ki briew kiba dei hok ban ïoh.
