Shillong, Risaw 31
U Myntri ba khmih ïa ka tnat Transport, u Bah Sniawbhalang Dhar, u la kubur ba ka jingshah pyrkhing ïa ki kali heh kynthup ïa ki bos ‘night super’ ban ïaid lyngba ka jingkieng Umïam ka la pynlong ïa ka Inter State Bus Terminus (ISBT) ha Mawïong, ban thylli bad khlem lah ban treikam.
U Myntri u la ong ba ka Sorkar lyngba ka tnat PWD (Roads) ka la sdang ban shna ïa ka surok thymmai kaba sam lyngba na Mawlai By-pass shaduh Shillong Airport ha Umroi.
“Hooid ïa mynta ka la don ka jingktah ïa ka ISBT namar ka jingshah pyrkhing ïa ka surok na jingkieng Umïam, hynrei tang shu la dep ka surok thymmai, ka ISBT kan sa treikam biang kumba ju long”, la ong u Myntri.
U la ïathuh ba ka tnat Transport ka la kyntu ïa ka tnat PWD (Roads) ban pyndep noh ïa kane ka surok ha ka por, khnang ba ki kali heh kin ïoh ban ïaid na ka surok thymmai bad ban lah pyntreikam biang ïa ka ISBT.
U la ïathuh ba ha ka jingïakren bad ka tnat PWD ïa katei ka surok thymmai la buh ban pyndep hapoh shisnem, bad u la pyntip ruh ba u la kyntu ïa ka tnat ba dei khmih ba lada long kaba lah ban pyndep shwa ïa ka por ba la buh.
Lah ban kdew ba ïa ka ISBT ha Mawïong la plie paidbah da u Myntri Kam Pohïing ka ri India, u Amit Shah ha u Naitung, 2022. Ka jinglut baroh na ka bynta ban tei ïa katei ka jaka pynïeng kali ka long T.48 klur da ka jingmang pisa 90 percent na ka North Eastern Council (NEC) kaba dei hapoh ka DoNER Ministry bad na ka Sorkar Jylla 10 percent.
Kumba ka long mynta ha ka ISBT ba la pynïaid da ka Meghalaya Transport Corporation (MTC), ki bos kiba wan sha sor Shillong ki khlem leit sangeh shuh ha katei ka jaka hadien ba kim ïohlad shuh ban ïaid lyngba ka jingkieng Umïam kaba la pynlong pat ïa katei ka jingtei ba T.48 klur ban kynjah slam-slam.
Kane ka jingsangeh treikam ka ISBT ym tang ba ka la ktah ïa ka rukom kamai ki bos, hynrei ka la ktah ruh ïa ka kamai-kajih jong ki briew kiba shong dukan ha katei ka jaka ba ki la shim wai.
Hashwa ban sangeh treikam ka ISBT, ki don kumba 29 tylli ki bos kiba ju kyntiew bad pynhiar nongleit nongwan na katei ka jaka, ba kynthup 17 tylli kiba dei jong ki ‘riew shimet, bad ki don ruh kumba 34 tylli ki dukan.
